O le po o le Aso Toonai na faatunuuina ai le siva saili seleni a le asosi a tama tuai a le Malisi Sagato Iosefo i Yagoona lea sa faatumulia ai le mamalu o le atunuu. O le saunoaga a le Peresetene susuga Hendry Lees, o le auga o lenei faamoemoe o le tapena ai o ni meaaoga ma itu e fesoasoani atu ai ile Kolisi na aotauina ai i Samoa.
Na saunoa foi le Peresetene Hendry Lees e faafeiloai le paia ma le mamalu o le aofia ma molimoli atu le agaga faafetai ma le faagaeetia ile faatalauula atu. O le faaili a le Sensation Band na faafiafia i lenei faamoemoe sa valaauina ai le Fono Aoao a Tagata Samoa faapea isi Faalapotopotoga ma Asosi o sui tuai a aoga.
O le afioga foi ile Konesula o Samoa i Sini Afioga Fonoti Manogiamanu Etuale Ioane sa fai ma malo faapitoa faatasi ai ma afioga ia Patele Bro Kevin Mears ua loa tausaga o faiaoga i Samoa, Patele Felise Ielome aemaise Patele Faalelei Tapuala sa ia amatalia le faamoemoe ise tatalo amata.
Sa vaaia le tele o le maau ma le milomilosia o le valaaulia e ala i siva samoa mo pelega o le Aoga. Na tatala ile siva a le Afioga ile Konesula ma faagasolo ai lava lea o faafiafaiga o le po.
Na saunoa le Afioga Fonoti ile sao o le aoga ma faailoa ai foi le tautua matavela a Patele Kevin Mears mo aoga i Samoa. Sa auai foi aiga o sui taitasi e pei o le Susuga a Joseph Paulo o le Toa Samoa lea foi sa tauala atu ile susuga ile Peresetene o Hendry Lees.
O aoga sa tauaaoina foi a latou saasaaga o SCOPA, SMOGA, CHANEL faapea se tasi o tama pese tuai o le aoga sa malaga taamilo i Melepone, Brisbane ma Sini le susuga ia Lose (Rose) H Tominiko sa auai.
E lē gata i lea na auai mamao foi mai Aotearoa se isi sui tuai o le Kolisi ma o se suafa ua silafia ele toatele i luga o peau o le ea i leitio faasalalau, le fetalaiga ia Seumanu Francis Ioane e lagolago le faamoemoe.
O le afioga foi ia Papalii Lorenzo Fepuleai ose alii faipisinisi ua iloga i Sini sa faapea foi ona auai atu e opogi lea faamoemoe.
Sa faamalieina foi le aofia ile tele o faailoga ose lulu na faatauina ma se‘i ai ile po, e aofia ai ni ofu lakapi o le Manu Samoa ma ni fagu ava malosi. O le po foi lea na faia ai ni laulau faapitoa ‘Reserved’ mo valaaulia lea sa maualuga ai le afiafi.
O le Faufautua a le Fono Aoao a Tagata Samoa i Sini Rev Iakopo Leleimalefaga ma le faletua ia Faiesea na auai atu male Afioga ile Peresetene male sui Peresetene ia Faumuina Lisa Parker faapea sui o le Fono, e momoli la latou foai ma faia se Siva Samoa e faafetai ai ile asosi a Sagato Iosefo Malisi Sini, mole lagolagoina atu o tapenaga o le Tutoatsi ia Iuni i Sini nei, e ala ile Savali Faaaloalo, Siva (Ball) faapea le auai atu ile Samoa Day 2016.
Sa taualuga taualumaga ele Fofoga o le po, Pululipano Brian Sea ma ta‘ape ai ma le fiafia le aofia.
