E silia i le onosefulu le au malaga a fanau ma faia’oga o le Kolisi o Samoa na tuuva’a ese ma Samoa i le aso Toonai na tea nei.
O le au lakapi a alii ma le au netipolo a tamaitai o le a faia ni taaloga i Sini ma nisi o au lakapi ma netipolo o le a latou taaalo ma ni au fili i le aai o Sini.
O se aulotu Katoliko Samoa i lea aai tele o Sini o le a faamautu ai le malaga mo le vaiaso atoa ona tatala lea o le au malaga e asiasi ma tafafao i aiga mo aso e fa ao lei malaga ese mo Niusila i le aso 25 o le masina nei o Aperila.
E tasi le vaiaso o le a afea ai Aotearoa ma e lei faamautuina mai pe faia ai ni taaloga i Niu Sila, ae na faaalia e le tamaitai Pule lua o le Kolisi le susuga Karene Faasisila, o le a malaga fanau ma isi sui o le au malaga e tafafao i aiga ona toe taliu lea i Samoa i le aso 3 o le masina fou o Me.
O le faamoemoe autu o le malaga e pei ona faailoa ise feiloaiga a matua, o fanau o loo malaga ma le tamaitai pule lua ma nisi o faiaoga o loo aofia i le aumalaga, o le sailia avanoa lea mo fanau e faamasani ai ma isi fanau e tausinio i taaloga.
O le a maua ai se isi aoaoga lelei mo i latou aemaise lava o le siitia ai o le olaga tauivi i taaloga ma ia maua le agaga o le fealofani ma le olaga o le tausi o le nofo lelei ma le filemu.
E lei faigofie le faatupega o le malaga ona sa tagi lava i lima o matua le faatupega o fuafuaga uma e oo i pasese.
E le o se sailiga seleni le mafuaaga o le malaga, e pei ona faaalia e le tamaitai pule lua o le Kolisi o Samoa, peitai o le a iai ni faafiafiaga e faatino e le fanau, a maua ai ni seleni i le agalelei o le atunuu i Ausetalia o le a faaaoga e faatau ai ni mea taalo mo le atinaeina o taaloga a le kolisi.
E le o se taimi muamua lea ua alu ai se malaga a le au lakapi sefululima a le Kolisi e pei ona faaalia e le pule lua.
O ni tausaga ua mavae sa faatino ai foi le faamoemoe lava lenei e tasi, ma e toatele fanau na latou maua ai ni faalumaga lelei mo lo latou olaga taalo aemaise o le feiloai ai ma isi tagata e le masani ai, aemaise o avanoa e silasila ma maimoa ai foi i le olaga o tagata i isi atunuu aua o se tasi lea o mataupu o loo latou aoaoina o le tala faasolopito o atunuu eseese o le lalolagi ma le soifuaga o tagata o ia atunuu.
O Ausetalia ma Niusila o loo pito toatele ai tagata Samoa o aumau ma nonofo ai o se avanoa lelei e feiloai ai fanau ma o latou aiga aemaise o tausoga i augatupulaga io latou siosiomaga faaleaiga o loo ola ma soifua i ia atunuu.
