O le malaga faapitoa mai i Sini a le failipu iloga a leoleo a Samoa mo le faamanatuina o le selau tausaga talu na mae‘a pulega faakolone a Siamani i Samoa, na fai ma avanoa e faafofoga ai Sini i le agavaa ma le mālie o a latou fatuga.
O lenei valaaulia na tauala atu i se kamupani fai atatifaga ma faafiafiaga le Carriageworks i Redfern,Sini lea e galue ai se tasi o alo Samoa le Tofa Lalau Leo Tanoi. Na saunoa Tanoi o se manaoga o se tufuga (artist) Samoa mai Niu Sila ia Michael Tuffery na amata ai lenei taumafaiga e auina mai ma faalauiloa i Sini nei le failipu a leoleo.
O le susuga Michael Tuffery o se Samoa, Tahiti ma Rarotonga ma o lona soifua ai i Samoa a o lei malaga ane i Niu Sila e maofa lava i le leo o le failipu a malu o le malo ae lē gata i lea o le faigata ma le aloaia o fatuga Europa, Nienna ma Siamani e usuina e leoleo. O lana sailiiliga na iloa ai o le mafuaaga o loo tumau ai pea nei pesepesega e mai le vaitau a o pulea e Siamani Samoa.
O taeao uma lava i Apia e vaaia ai pea le togiga paepae ma pulou o malu o le malo ma le latou faili o savalia magaala mai le ofisa autu i Tauese seia oo atu i lumāmaota o le fale o le malo i Matagialalua mo le sauniga o le sisiina o le Fu‘a o le saolotoga.
E faagasolo pea lea tiute i le taimi masani o le 8.45 i taeao uma mai le Aso Gafua i le Aso Faraile. Na saunoa Lalau na tusi aloaia le Carriageworks i le afioga i le Palemia o Samoa mo se faatagaga aemaise le totogiina uma o alauni mo aso e lima na iai i Sini.
E lē gata i lea na totogi foi la latou faletalimalo ma femalagaiga uma mai le Aso Lulu seia toe taliu i le Aso Sa. Na faia se feiloaiga ma le atunuu i Sini nei aemaise le Fono Aoao a Tagata Samoa i le ‘ava faatupu sa auai ai le laulau a Fono faapea le Taitaifono afioga Muagututia Vailolo Siutu, Fata Pati Masini, Leilua Jerry Uesele, Rev Iakopo Leleimalefaga.
Na avea le afioga i le Konesula Fonoti Manogiamanu Etuale Ioane ma sui o le Malo Samoa i lea aso ae o le Afioga Tony Grant le sui Palemia Setete o Niu Sau Uelese na fai ma sui o le Malo. O le taitai o Leoleo o le setete ia Andrew Scipione na fai ma sui o le failipu a Niu Sa Uelese.
I upu o le saunoaga a le Sui Palemia Setete ia Tony Grant, “O Samoa ua lauiloa i le lalolagi ma Ausetalia nei i soo se taleni aemaise lava i le lakapi Iuni ma le lakapi liki, e lē taumate o le a faapea foi ona faafiafiaina e le failipu lenei mai Samoa le aofia i aso e lima i Sini nei.”
O le Afioga i le faatonu manumalo Rev Elder Peleti Toese Toailoa ma le faletua ia Senetenari na molimoli foi sa la faamanuiaga mo le aumalaga ma le faamoemoe ma amatalia ai loa a latou faafiafiaga.
E tasi le faafiafiaga o le Aso Tofi ma le Aso Faraile i le itula e fitu i le afiafi. O se vaaiga uigaese le matagofie o le teuina i ietoga ma siapo o totonu o le maota aemaise le maati ma le manino o masini faaleotele leo sa faafiafia ai le faailipu.
O luga foi o le ata tifaga na faaali ai ni ata mai vaitau o Siamani ma Samoa i le selau tausaga talu ai. Na mataina foi Siva Samoa na faatinoina o Siva Samoa e le autalavou EFKS Canterbury ma le faifeau Rev Iakopo Leleimalefaga aemaise le Matavai Cultural Arts ma a latou siva. Sa vaaia foi le pepese fiafia o nai tagata matutua i pesepesega tuai na usuina e le faili ma o le agaga lea o Michael Tuffery ia toe manatu ai le aumaimoa i fatuga o anamua. O le afioga i le Hai Komesina fou o Samoa i Canberra Hinauri Petana na tauaaoina i ai pine tauoloa a le failipu e lana afioga i le taitai Nafoitoa Alesana Laki.
O le po o le Aso Tofi na faaiu ai le faafiafiaga ma valaaulia ai le aofia ma palagi na auai mo se ipu koko ma nai german buns e 400 sa tofo ai tagata i lea po i taumafa na amata mai i vaitau o Siamani i Samoa. E lē gata i lea o panipopo, Paifala (pineapple pies lea na saunia e le Polynesian Umu Cooker Catering.
O le Aso Toonai na taualuga ai la latou faafiafiaga i le faatumulia o le lua i le aoauli faapea le fitu i le po ma taualuga ai i se taumafataga tele i se suavai (umu) na faavai ai se manufata, palusami, mamoe ma isi taumafa faasamoa e faalauiloa ai gasesega samoa. Na taumafa fiafia ai foi ma sui o le faili a leoleo Niu Sa Uelese ma ta‘ape ai i le alofa o le Atua.
O sui nei o le Failipu na masii mai:
Sala Opetaia Lauina, Muao Seiuli, Tavita Tunupopo, Avei Avei, Tavita Tanielu, Waikiki Laufili, Filipo Lesa, Etuale Maiava, Siaosi Sauvao, Vevesi Soia, Britannia Viliamu, Laumata Meaalofa Ikenasio, Christina Poluleuligaga, Emme Eteru, Afoa Afa, Carmen Tausili.
