Maoae le agaga fia fesoasoani o papalagi i mafatiaga o Samoa

E lua pusa tetele la‘u oloa (containers) a le Runik Polynesian Town (a Niko ma Ruth Burgess) o se tasi foi o alo o Samoa ua alualu i luma lana tautua i totonu o Kuiniselani e ala i le Runik Polynesian Town, faatasi ai ma lona faletua le tamaitai palagi mai Kalaisetete i Niu Sila, o Ruth Burgess.
O le Runik Polynesian Town ua lauiloa i le faatauina ai o soo se laei Samoa, meataulima ma vaega uma e manaomia e nai o tatou tagata e auina sao mai Samoa, aemaise o loo taunuu mai uma i ai CDs ma DVDs a le Visual Magazine, Aau Production ma Vili Ieru.
O se tasi o a la faauo, o se ulugalii papalagi o Philip ma Irene, o i laua foi ia o le a malaga faatasi atu i Samoa ma Niko & Ruth Burgess aua le auina atu o ia containers ua fuafua e taunuu i Samoa i le aso 21 o Novema, aua o Niko e i totonu o le Komiti o le Tsunami Appeal.
O loo lafo faatasi ma isi containers e 4 a le mamalu o Samoa i Kuiniselani lea foi e malaga uma ai le komiti o le Tsunami Appeal 2009 aua le auina atu i le malo mo nai o tatou tagata.
O le taimi nei, ua tuuvaa atu nei containers e 6 faatasi ai ma se seleni e auina atu e le komiti o se sao foi o Kuiniselani i le pagatia o o tatou aiga ma le mamalu o Samoa sa afatia i le galulolo.
O le susuga ia Moefaauo Toafa ma le faletua ia Victoria lena o loo pue le latou ata ma Ruth i luma o le Runik Polynesian Town i Inala, na ia logotala loa i containers a le Runik, e lei toe faatali ae auina atu loa se vaega tele o fesoasoani ua uma ona tuu atigipusa e auina i si ona alalafaga o Lalomanu.
O le upu moni e tuuina atu fesoasoani a nisi o tagata Samoa ua fau ma soloi nisi o fesoasoani a nai tagata papae sa faaosofia i lagona alofa ma le fia fesoasoani ona o ata DVDs o le sunami sa maimoa ai ia sa faatauina mai le Runik Polynesian Town, Enchiro Laei, le Sina World Travel ma le Paepaelaye i Goodna, o nofoaga ia e faatau ai DVDs Samoa.
A o faagasolo nei sailigatupe, ae filofilo ai lava ma nei papalagi. O le susuga ia Philip ma Irene o le laua tautua o le faatauina atu lea o laptops, o se uo mamae foi a le susuga ia Niko ma Ruth Burgess.
E tele ni tagata Samoa i Kuiniselani ua tofusia i nei laptops taugofie ma o le lagona o lea foi Samaria, ina ia fesoasoani pea mo tagata Samoa.
Sa o latou ofoina fua ni laptops e tuuina atu mo le foai o le a laki i le se’i faapitoa o suafa uma sa tuuina i totonu o le pusa, o i latou uma ia sa togi maa e ala i sailigatupe o le leitiofoni.
O le tau aofai o le laptop e ova atu lona tau i le afe ($1000.00) peitai e lei manumanu nei tagata i le fia fesoasoani.
E fia afe suafa sa tuuina i le se’i peitai o le isi laptop sa manumalo ai le leitio a le Penina o Asuisui 1197am, ae o loo fuafua o le Aso Sa o lumanai nei o le a toe se’i ai le isi laptop poo ai foi o le a faamanuiaina ai.
O loo saili lava e le sui o le Komiti o le Tsunami Appeal a Kuiniselani lona ia pasese pe a fia malaga e tauaaoina atu nei faamomoli i Samoa, ma o le a latou pueina mai ni DVDs i vaega uma latou te faagaioia i Samoa i nisi o alaalafaga sei molimau foi i ai le mamalu o le atunuu o alaala ma papaaao i Kuiniselani.
O le kamupani a le Sina World Freights lea o loo lafo ai nei containers ma o le a malaga ese atu le komiti ma le susuga ia Niko & Ruth Burgess, Samaria Philip ma Irene i le aso 28 o Novema i Samoa. Ua nofo tapuai nei le mamalu o Samoa i Kuiniselani aua le toe taliu mai o lenei faigamalaga ma nisi tala fou i le tulaga ua oo i ai nai alalafaga sa afaina i le galulolo.