Ua amata nei le taamilosaga lakapi sefululima a tamaitai oloo taalo ai Samoa NSW, NSW Maori ma NSW Tonga lea na vaaia ai le talenia, saoasaoa, malolosi, ma lava ole mānava a tamaitai ole ‘au a Samoa NSW ina ua manumalo ia NSW Maori. O lenei taaloga na faia ile malae ale Harlequins i Campbelltown ma sa maimoaina ele atunuu, mātua, aiga ma uo. Ole ‘afa muamua na faataututu ai ‘au e lua ma sa tele ina fetaui le laina i luma ma iloilo le pue male osofai ale isi ‘au. Na amata iloa ai foi le malosi laitiiti lava ole pue a NSW Samoa lea na vaaia le mafatia ai o Maori. E uma le taaloga ua lami NSW Samoa 47-5 ma iloga ai le malosi o tamaitai Samoa aemaise le mataina ole taalo a Alexandra Sulusi lea e taalo mole sefululima Ausetalia (Wallaroos) ile 2016. Ole isi tamaitai taalo lelei ia Kayla Sauvao na ole sefuluvalu tausaga ua mataituina nei foi ele lakapi a Niu Sa Uelese ma Ausetalia lana taleni, lea na vaaia le malosi o lana taalo ile Aso Toonai e pei ona ia maua ai sikoa sosoo e lua.
Ole isi tamaitai talavou ia Sally Fuesaina e taalo mole kalapu ale Harlequins i Campbelltown ua iloga foi le agavaa ma ua filifili mo NSW Country male Manu Sina.
Ole susuga ia Sene Auelua le faiaoga oloo nafa male faafoeina ole ‘au, ae lagolago iai le susuga ia Campo Faavae Eli ma Masani Lemusu. Ua sauni atu nei NSW Samoa i lana taaloga lona lua ile Aso Toonai nei e toe taaalo ai foi ma NSW Maori ile Concord Oval sosoo ai ma NSW Tonga ile Aso Toonai a sau, 30 Setema ile malae lava ale Harlequins.
