O lagona o le mitamita i soo se Samoa i tafa e fia o le lalolagi ina ua taofi faafuasei e le laufali le fusuaga ua manumalo Mark Hunt i le po o le Aso Toanai, i lana taaloga sa faia i Iapani i Saitana Super Arena a le UFC, lea e sauni le fusuaga, e valu kilo na faapau a le tatou tama mo le fusuaga ma Roy Nelson.
Na silamiō le lalolagi ina ua toe faatepa e Mark Hunt le alo fusu (kickboxing) o Samoa le alii Amerika o Roy Nelson i le la taaloga na se‘i mavae i le faaiuga o le vaiaso i le tu‘i oti i le taamilosaga lua.
O se taaloga finau ma faigata mo le alo o Samoa 40 tausaga Mark Hunt, ona o Nelson o loo tulaga 8 i le faatulagaga o tama fusu taufea‘a o le UFC (Ultimate Fighting Championship) i Amerika.
E taofi eseese nisi, auā sa iai masalosaloga e ono umi se taaloga pe a fua atu i le tulaga fusu taufea‘a faapolofesa o loo iai le paga lea, o loo faatulaga uma Hunt ma Nelson i le sefulu pito i luga o le UFC, peitai na vave mou na masaloga ina ua vave faamuta e Hunt le taaloga i se iuga faafiafia loto.
E taufai malolosi ma tutusa le fetauiga i le maitau i le taamilosaga muamua, o le tele o le tu‘i misi, e osofai se faalava a Nelson ‘alo i lalo Hunt misi, ea i luga apakaki le taumatau ae solasola i tua le alii Amerika.
O le fā minute muamua o le taamilosaga muamua, toeitiiti lava a taugā lelei le sasau o le taumatau o Hunt pe ana lē vave le ‘alo i lalo ma le alu solomuli a Nelson.
O se tasi o tulaga na maitauina, o le taumafai lea o Nelson e osofai i lona malosi ma faamasau le so‘a tu‘i, taumatau-agavale, faase ae tau aapa lava le lima e kapa le vae agavale o Hunt, e laki lava o le lelei o le vaai a le tatou tama, e lei sao ai lava le tau faapo lea a lana paga.
Peitai e masasau foi le unai o vae o le ofu lanu uliuli o Mark Hunt, semanu ae faaletonu ai Nelson i le ogatotonu o le maea. E mae‘a lava le taamilosaga muamua o finau lava le fusuaga ma le lilo i manatu o se faate‘i a le Super Samoa o loo folifoli mai i tua, i le taamilosaga lua.
Atonu e pei o lagona faateia o soo se tagata tapuai Samoa na matamatama i le fusuaga na se‘i mavae, ai e faapena lagona o le ofo na faaleo mai e le aufaasalalau ina ua faamuta faafuasei le taaloga i le na o le fā minute talu ona amata le taamilosaga lua.
E ta le logo amata le taaloga, olioli i i le ogatotonu sasau le taumatau o Nelson ‘alo i lalo le tatou tama, misi, tali mai le taumatau-agavale o Hunt ae ‘alo ‘alo i lalo le alii Amerika toeitiiti lava a taugā lelei i le ulu, le faalava a Hunt.
Na osofai loa e Nelson ma unai i lalo Hunt, tietie ai i luga ua fusu faapipii pe a ma le luasefulu sekone o taumafai lava Hunt e faamamulu ese le Amerika.
Sa fai si faigata ona e foliga mamafa le alii, ua taoto lelei i le patua ma ua mau le taofi o ona vae i puimanava o Hunt, peitai na pei o le lelea a le laupepa Nelson, ina ua toe faato‘ato‘a lelei le tu a Hunt, e ui lava ina toe tau‘ai atu isi so‘a tu‘i a Nelson, ae na faato‘ato‘a lelei loa le pupula a Super Samoa, soso i luma, tu‘i, tasi, lua, tolu faasasasasa i le autafa, apakaki loa taugā i le auvae, pa‘ū ifo ai lava i lalo toe sasa le gutu i totonu o le maea, ma taofi loa e le laufali le taaloga, ua manumalo Mark Hunt.
O lea manumalo ai o Mark Hunt ua lalata ona tafa mai ai ata o tau lelei mo sona avanoa lata mai e fusu ai mo le fusi o le lalolagi, e ui ua faasolo ina matua foi le soifua, ae moni ai le upu faasamoa, e matua lava le pusi ma si ana fela‘u, e le’i taitai lava lona malosi i le faatinoga o le taaloga.
O loo iai lona naunautaiga e fia taalo i le UFC 55 lea o le a faia i totonu o Sini Ausetalia i le aso 8 o Novema i le faaiuga o le tausaga nei, pe a maua sona avanoa, ma le moemitiga mo sona avanoa e taalo ai i totonu o Ausetalia, ona o loo aumau ma nofo ai lea alo o Samoa.
Se‘i tālia ana taumafaiga o mulimuli mai, ia taunuu moemitiga a ia maua foi se iuga manuia auā le tapuaiga mo Super Samoa Mark Hunt.
