E latalata i le lima selau tagata sa auai i le molimauina o le se‘i faapitoa mo le tausaga 2010 a le kamupani ua faaigoaina o le Vaa o Noa.
O le se‘i sa faatulagaina mai mo le tausaga atoa mo i latou uma sa faaaogāina ma teu faaagaga a latou seleni i teugatupe a le kamupani mo le faamoemoe e faatauina ai se fale poo se maota mo le aiga.
O se faiga ua matuā viia e le toatele o tagata ma aiga Samoa, ona e lē gata ina malupuipuia ai o le tupe teu, a o le vave foi ona faataunuu ai o le miti mo le aiga mo se fale faatau.
O le ala foi lea na vaaia ai le toatele o le mamalu o Samoa, aemaise isi tagatānuu sa lolofi ane e molimauina lea faamoemoe sa faataunuuina i le afiafi o le Aso Lulu, aso 1 o Tesema.
O le se‘i sa folafola lava mai le amataga o le tausaga, o suafa uma o aiga e iai totonu o le polokalame a le kamupani o le a mafai foi ona tuuina i totonu mo le se‘i faapitoa e manumalo i se meaalofa tupe e $10,000. O lea vaega tupe tele sa ofoina e le Vaa o Noa, sa fuafuaina faaletulafono ona aiaiga.
Sa manino lava e lē mafai ona tuuina le tino i tupe mo lē o le a manumalo, peitai o le a tiposi sa‘o lava i le teugatupe mo le faatauina ma le faataunuuina o le manaoga mo se fale faatau. Sa molimauina foi e le Samoa Times ia tulaga uma ma lona faatinoina i lea po.
Sa auai foi le alii loia o Jesse (Iese) Tata, ma o ia lea sa faamaonia ma molimauina faaletulafono gaioiga uma sa faia mo le faataunuuina o le se‘i.
E lua se‘i sa faataunuuina ai lava i lea afiafi. O le se‘i muamua sa faia o se meaalofa a le kamupani mo i latou uma sa faatasi ane ma auai i le po lava lea.
E lei faatulagaina foi le toatele o i latou e fia tuu suafa i totonu o le se‘i. O le manumalo sa ofoina e le kamupani le $500 tino i tupe i lea lava po.
Ma o le tina ia Lupe Onosai Lamositele mai Magele sa faamanuiaina ma tuu sa‘o loa i ai le $500 tino i tupe e pei ona sa fuafuaina.
O le se‘i lona lua, o le faapitoa foi lea o lea afiafi e tusa lea ma le $10,000 e fesoasoani mo le tiposi o le fale o le tagata poo le aiga foi e manumalo.
O le suafa muamua sa laki, peitai e lei auai ane, e tusa ai ma aiaiga sa faataoto i totonu o lea polokalame, e mafai ai ona toe saili se isi numera, pe toe se‘i foi se isi suafa pe afai e lei auai lē na muamua.
E lima minute o tālia pea ma faasalalauina le suafa na manumalo muamua e tusa ai ma aiaiga, peitai sa leai lava, ma toe faataunuuina ai loa ma tuu le avanoa mo le isi numera.
O se fiafiaga tele i le tina o Ava‘e Tulia mai Glen Innes ina ua toe fai le se‘i, ma faalogoina ai lana numera. E lauina le suafa o le tina na manumalo, ae na muamua lava sisii ona aao ma savali loa i luma mo le sapaiina o le siaki e $10,000.
O le alii papalagi o Luke Atkins o loo faauluulu i ai lenei kamupani, ma lana aufaigaluega laufofoga fiafia, o Julie, Bob, Sema, Florence, Lina, Leaia, Losa ma Liza.
