Manatua Fiasili Keil i le foai mo le Loto Taumafai

O le tausaga e 1978 na faatūina ai le faalapotopotoga ua taulai i le faaleleia o soifua aoaoina o fanau e iai manaoga faapitoa le Loto Taumafai. O le tamaitai na faatūina lenei faalapotopotoga e suafa ia Fiasili Keil.
Na maliu lea tamaitai ina ua aafia i le gasegase na pepē uma ai musele o lona tino, multiple sclerosis.
O se gasegase na faatoa maua ai Fiasili ua matua ae o se tagata e alofa tele i fanau a le atunuu ma o le mafuaaga lava lea o le agai e faavae se nofoaga faapea.
O le vaiaso lenei ua toe manatua ai le sao o lenei tamaitai e se tasi o ona aiga – o le tamaitai o Stella Sherman o Boston i Amerika.         O Stella na ola i Samoa peitai na malaga atu ma faalautele ana aoaoaga i Hawaii faapea ai Amerika lea ua nofo ma galue ai.
O le faaiuga o le vaiaso na faamanatu ai le 50 o tausaga o lona soifua ma faapea ai ona ia talosagaina ana uo aemaise o ona aiga
ina ia foai tupe i lona aso fanau ae lē o meaalofa.
Na aoina i lea faatasiga i le Cocobanana i le Aso Toona se tinoitupe e $10,000 ma o le tupe lena na tauaao atu i le Loto Taumafai i le amataga o lenei vaiaso ma le faamoemoe e fesoasoani i nisi galuega moomia auā lava le aoaoina o fanau aemaise o a latou polokalame faatino i lea aso ma lea aso.
O le faamoemoe o lenei tamaitai ina ia faia lenei fesoasoani i tausaga uma ma ua iai foi ana fuafuaga ina ia malaga mai i Samoa i taimi nei o lona aso soifua ina ia faamanatu ma aoina ai le seleni mo fanau aoga a le Loto Taumafai.
E tele ma anoanoai i latou na faafetaia e lenei tamaitai i le agai atu ma foai atu seleni auā lenei taumafaiga ma na ia faaalia o le nofo ai i Amerika e tele faamanuiaga o loo maua ae o le toe foi mai lava ona o le iloa e tele auala e mafai ai ona fesoasoani mai tagata Samoa ua mautu i fafo i faalapotopotoga e pei o le Loto Taumafai.
O le faafetai a le Afioga Letaa Daniel Devoe, le peresetene o le Loto Taumafai, o le iai o le alofa faaauau i nei tagatānuu o Samoa o loo nonofo i fafo e fesoasoani mai ai i le taumafai e atinae fanau ua iai manaoga faapitoa i le itu tau i aoaoga.