O se talosaga i le pulega o le kamupani o le Pacific Ezy Money Transfer ina ia tatala sona lala i le maketi fou i Vaitele-tai ua vave ai ona faatu se uluai auaunaga faapea i lea maketi e lei leva ona tatala ma amata faaaogā.
Faaalia e le alii pule faatonu o Faimalo Allan Stowers, o le amata ai o se lala fou o lana kamupani tala tupe faamomoli i le maketi i Vaitele-tai o se isi lea laasaga lelei o le a toso atu ai tagata i lea nofoaga ma faaaogā pisinisi o loo iai, aemaise o fua o faatoaga ma isi oloa laiti ua faatau i le maketi.
O se fesoasoani lea mo tupe maua a i latou ua faaaogāina le maketi mo pisinisi, e pei ona molimau mai se tasi o taulealea o loo iai le la poloka i lea maketi, e lē tutusa le toatele o tagata faatau i Vaitele ma le tumutumu o le maketi i Fugalei.
O le mau foi lea o loo faaalia e isi tagata ua totogi poloka ma lisi o faleoloa.
O le ofisa fou o le Pacific Ezy Money i le maketi i Vaitele ua tolu ai ona lala ua faagaioia e pei ona iai le isi i le fale fou o Amau i Saleufi, ma le lala i le maketi i Fugalei.
O se tasi o itu lelei i le tatala ai o lea auaunaga i Vaitele ona ua oo atu i ai ma le fesootaiga faainitaneti saoasaoa o le broadband a le Bluesky SamoaTel. O le a manuia ai ma nisi pisinisi e tatala i lea nofoaga e manaomia lea fesootaiga vave.
O le afioga Patele Teofilo Tuilo‘a Schmidt na ia faapaia le ofisa fou o le kamupani talatupe faamomoli, a o molimauina e nisi o le pulega e pei o le tamaitai pule o le kamupani i Samoa le faletua o Kolotita Stowers Ah Kau. O le fetaui o le tatalaina o le ofisa ma le vaiaso e tumutumu ai pisinisi talatupe i le atunuu mo le talaina o le alofa tulai o fanau ma aiga mai fafo mo le Aso Sa o Tina.
O le a faafiafiaina le atunuu nonofo mamao i le itu i Sisifo faasolo ane ai i le atu Safata ma Lefaga ua iai le lala o le kamupani i Vaitele o le a vave ona maua ai a latou seleni.
O loo faagasolo se faalauiloa a le kamupani o se lulu o loo sailia ai seleni mo le faameaalofa atu i le nofoaga o Tamaitai Sa Monike i Vailima, le Toomaga mo Tagata Puapuagatia, ma le polokalame o le 13 aso o pesepesega o le Kerisimasi o loo faatautaia e le ekalesia EFKS i Magele i Niu Sila.
Faaalia e Faimalo o nisi ia o auaunaga faasamaria a le Pacific Ezy Money, ma e lē o le taimi muamua lenei ua faia ai ni ana foai faameaalofa i faalapotopotoga tumaoti.
