Malu pea le puipuiina o le talita e le Tauaana Roosters

O le au a le Nation mai Avondale, o se tasi lea o au malosi o le taamilosaga a le Iuni lakapi a le Aukilani Samoa i lea tausaga ma lea tausaga. Sa faapena foi lona tulai mai i lenei foi tausaga 2008 e pei ona sao atu i au e valu pito i luga i le vaega o le ipu autu o le taamilosaga. O le Aso Toonai la na tea nei, na maua ai lona avanoa na te luiina ai le talita, lea o loo umia e le au a le Tauaana Roosters mai le afioaga o Falelatai. I le maimoa atu a le atunuu na molimauina le taaloga, o se taaloga manaia ona o le finau ma le tausinio a au uma e lua. E fitu minute talu ona amata le taaloga, ae maua loa uluai ai, ina ua faasala e le laufali le au a le Tauaana, aaina e le Nation ma ova tulai mai ai ai o le taaloga 3 le Nation ae leai le Tauaana. Faagasolo le taaloga ma e sefulufa minute ua maea o le afa muamua lava ae sikoa loa le fulupeti a le Roosters, le alii o Kose Silva ma ova foi le aa i le pou tulai mai ai loa ai 7 le Tauaana ae 3 le Nation. E ta ane le malologa ma maea le afa muamua, ua 12 le Tauaana Roosters, ae 9 ai o le Nation.
Na leai se tagata matamata na tuua le malae ona o le manatu, e pei e foliga mai ua maluelue le talita ma e ono malaga atu ma le Nation i Avondale. I le amata ai la o le afa lona lua o le taaloga, o le tulaga lava lena na molimauina e le mamalu o le atunuu i le tau fai malolosi uma o au e lua. Peitai, ina ua maea ma ili le faaili a le alii laufali ua uma le taimi, na manumalo ai le Tauaana Roosters i ai e 22 i le 9 a le Nation. Ma ua toe mau foi la le talita i le Tauaana mo lenei foi vaiaso. O le mataina o le taaloga na vaaia lea ina ua matala mai le uigi a le Tauaana le alii talavou o Gabe Fonoti mai luga o le latou laina 22, ma sikoa ai i lalo o le pou i le afa muamua o le taaloga. Momoli ai le faamalo ma le faafetai i au e lua, ona o aga faatamalii na faatinoina ai le taaloga. Ua sauni mai nei la le au malosi a Saleimoa Black mai le afioaga o Saleimoa mo le luiina o le talita i le vaiaso nei, ma o le au o le a manumalo o le a see atu foi e taalo mo le siamupini o le taamilosaga autu o le ipu, faatasi ai ma le talita i le vaiaso i ona tua atu.