O le tali lea a le alii pule o le Kolisi o Avele ina ua tapa sona finagalo i le isi foi lipoti o se tama aoga i le vasega faaiu o le Tausaga 13 ua faaoolima i se tasi o tama o le tausaga amata o le Kolisi, le Tausaga 9.
O le tama laitiiti lea e fai le lotu a tamaiti ae ave i le falemai e ona mātua. O lona igoa o Kolisi Malietoa. O se alo faasino ia Papalii ma Alofa Malietoa o Malie. E leai lava se pisa o le alii i ona mātua o ia na fasi e se tasi o tama matua o le aoga.
Peitai na vaaia e lona tina ua na o le faapupuu i le moega ma ua lē ‘ai ma ua na o le faapoululu lava ma pulou le ieafu. Na agai le tina e siaki ae vaaia ai manu‘a o le foliga ma faamalosia ai loa le agai i le falemai e fai se siaki. O le fa‘ata i le falemai i Motootua lea na faatoa tautala ai loa Avele ma ta‘u i lona tina o ia na tu‘i lona gutu e se tama aoga matua o le Kolisi i tua ane o le flea maketi i Savalalo. O iina e agai ai le fanau aoga e faatali taxi vans e ave latou i le aoga.
O le van la sa iai Avele na saofafai atu ma le isi ana uo e tausaga faatasi ae agai atu loa ni tamaitai aoga ma toe tutū ai ia taulelea ma agai i fafo. Ta‘ua e Avele e lei tu lelei i fafo ae tu‘i loa ma ia.
O le tu‘iga lea o lona gutu na tifa ai i tua ae sau le isi van o loo aumai ai foi nisi tama ma teine aoga o Avele ma taia ia. O le mafuaaga lea na ta‘ua e le fomai na vaaia ai manu‘a o lona fatafata ma ona lima. Faaalia e le alii o Avele ua fasi ia ona o le o ese ma le taavale ae ua sauni e alu talu ai le faaaloalo na ave i teine o le aoga.
O le tama aoga lea e igoa ia Sene e i le vasega 13 e lē o se taitai ae o le taimi na fasi ai Avele o loo tūtū lelei lava se tasi o taitai i autafa o le van ma o ia lea na faia le faatonuga i tama ma teine aoga ia na i totonu o le va e sa lava ona faitala se tasi, “aua ne‘i iloa e faiaoga ma le aoga le mea ua tupu”.
O le auala lava lea e faatino ai gaioiga a tama matutua, o le tala lea a Avele, a fasi lava se tasi pe fai ni faatonuga e tama matutua e matuā faasā lava ona ta‘u e se tasi i faiaoga.
Ta‘ua e le alii Pule o le Kolisi ia Luafalealo Mikaele, e lē o se faafitauli fou lenei faafitauli ma e lē na o Avele foi e aafia ai.
Ae o le galuega ua fai e le vasega o faiaoga ina ia taumafai lava e aumai mātua ma fanau ua aafia ona taumafai lea e faatalatalanoa le mataupu ma le manatu maualuga ina ia iai lava le avanoa e sui ai nei fanau ma ia mafai ona faaauau pea aoga, peitai mo le alii o Sene, ua talosaga mātua o Avele i le Kolisi ina ia faaauau ana suega faaiu o le tausaga ona faatoa fai lea i ai o se faaiuga a le aoga.
O le popolega o Papalii ma Alofa, o lea ua mae‘a totogi e mātua o lea alii lona pili e sue ai i suega tetele o le tausaga 13 ma e tatau ona agai e sue a o lei iai se isi faaiuga e faia i ai.
“E malosi le matou galuega o le aumai o mātua ma fanau e faatalanoa faafitauli faapenei, ae e iai lava fanau e mafai ona vaaia suiga i mataupu nei, ae e iai lava foi isi fanau e matuā fiu lava faiga e taofi ai le fasi o isi tamaiti ae e fai lava,” o se faaaliga lea a Luafalealo.
E pei la o Sene na ta‘ua e le alii pule ua uma taumafaiga e taofi le faasauā i isi tama aoga ae o lea ua ave sa‘o lava i le ofisa o Leoleo ma o le tala a leoleo e faatāua le talosaga a le tamā o Avele ma o le a faatali leoleo seia mae‘a suega a Sene ona agai loa lea i ai mo a latou suesuega ae o lea ua maua le lipoti a le falemai e faatatau i lenei osofaiga.
O Avele o le tamaitiiti aupito maualuga lea le tomai i le tausaga 9 (Level 9). O ia na sili i Avele i tauvaga a tama ma teine aoga i le faaaliga o faataitaiga faasaienisi i auala e tali atu ai i suiga o le tau (Science Fair).
O se alii e atamai ae na ta‘ua e lona tina, o Avele sa aoga lava mai i lona laitiiti i le aoga a Ropati Lui Sitivenisone ae e lē uma le vina e agai i le Kolisi a Avele, ona o le aoga o loo faaigoa ai o ia.
O lea la ua tasi le tausaga i Avele ae ua manao Alofa e aveese lana tama. O le tali a Avele, e manao lava e faauma lana aoga ona faatoa vaai lea i se isi faaiuga e agai i ai.
