Ise lipoti na tuuina mai ele faletua ia Asuao Emi Suaniu faapea le faletua ia Tuifaasisina Maria Lafaele, o i laua oloo taitaiina mai le au savavali a North Shore, na faailoa mai ai le toatele ole mamalu ole atunuu ua leva ona faatalitali poo afea ole a tatala aloaia ai se savali i lea foi pitonuu o Aukilani i North Shore.
Ole pine o lea saunoaga ona ole afiafi ole Aso Lua 31 o Ianuari na tatala aloaia ai lea savaliga poo le Walking Samoans i lea vaega o Aukilani, ma sa maitauina ai le sagisagi fiafia atu o nai tamā ma tina matutua faapea tupulaga talavou e faatāua lea faatofālaiga lea ua manuia ai lea foi pitonuu.
Ole faamoemoe ma le agaga maualuga o lea faatofala‘iga ole naunau o nei faletua ina ia iai se mafutaga e mafuta faatasi ai tagatānuu o Samoa i North Shore, ma ia avea foi i latou ose komiuniti e maloloina uma ona tagata i soo se itu, ile agaga ma le tino (spiritually & physically).
Ole susuga ia Su‘e Mulitalo ole taitai ole Ekalesia Metotisi sa tatalo e faapaia ma faamanuia ile tatalaina aloaia ole savali. Sa faapea foi ona fetalai le tofa ia Teleiai Edwin Puni e momoli le agaga faafetai ile faletua ia Asuao Emi Suaniu faapea le faletua ia Tuifaasisina Maria Lafaele ile saili malo ma le finau i mea lelei auā le soifua maloloina o tatou tagata i lea foi pitonuu o Aukilani.
Ma o lea ua faamautu ma faamanino mai ole 6 ile afiafi o Aso Lua taitasi lea ua faataunuuina ai lea faamoemoe ile Sherperds Park i Beach Haven.
Ile savali ile itu i Sisifo oloo taitai ai le susuga ia Titiula ma le afioga ia Savea, ua faamanino mai foi le faaopoopo ole isi aso ole latou savaliga e pei ona iai le Aso Gafua o lea ua avea ma le isi aso e savavali ai nisi oloo fia savavali.
Ole naunautaiga ole susuga ile faafeagaiga ia Suluape ona e iai nisi ole mamalu ole atunuu oloo alala ma aumau ile itu i Sisifo oloo iai so latou manaoga e faia se savali ile amataga ole vaiaso.
E lē gata i lea o aso lea oloo faatinoina ai le savali ale ekalesia ale susuga ile faafeagaiga ia Suluape ma ua toatele foi i latou oloo fia mafuta atu iai, ma ole mafuaaga tonu lea ua faaaogā ai le Aso Gafua e savavali ai.
Ae ose tāua foi lea mo tagata uma, auā ua ova le tausami ile Aso Sa ae o lea ua tapena e faamalositino ile Aso Gafua. E tāua lou soifua maloloina lelei, o lou ola maloloina lelei oloo i ou lava aao.
