Malosi le taufaavalea i luga o imeli

Ua malosi lapataiga a le faletupe tutotonu o Samoa i le atunuu e faaeteete i le malosi mai o faiga taufaavalea ua faaaoga ai e nisi tuatusi o imeli a nisi o tagata faigaluega sinia i le Malo ma tagata fai pisinisi. O le mea e ofo ai o tagata o loo faia nei faiga taufaavalea e nonofo i Nigeria ae ua latou maua tuatusi o imeli a tagata e nonofo i Samoa nei.
O faiga a nei tagata ua latou ave ai ni tusi talosaga mo ni tupe e silia i le 2 poo le 5 afe tupe Amerika sei tau totogi ai faletalimalo ma isi mea manaomia i ni faigamalaga ma le faaupuga ua leiloa uma le seleni ona ua pau le ato tupe, ma le folafolaga faaiu e aua le popole a toe foi mai i Samoa ua toe totogi ma faaola le tupe o loo manao i ai. O se tasi o tamaitai sinia i le matagaluega a le palemia ma le kapeneta na faaaoga lana imeli i le vaiaso ua mavae ma le faaupuga o loo i Hong Kong, peitai o loo i Samoa lava lea tamaitai ofisa sinia.
O le amataga o le vaiaso nei, o se tagata ua leva tausaga o galue mo le faalapotopotoga o le taaloga soka, o lana imeli ua faaaoga. Faaalia e le faletupe tutotonu e iai tagata ua masani i faiga faagaoi i masini komepiuta latou te mafai ona maua tuatusi o imeli a isi tagata i ni gaioiga faalilolilo. Pau lava le fautuaga o le aua nei amanaia pe tali fua i ai.