Malo se tamaitiiti Samoa i le tauvaga a le The Warehouse

E na o le alii Samoa o Jahkeal Evalu, e 7 tausaga le matua le tamaititi mai Aukilani ua aofia ai i le toafā o tamaiti mai ia Niu Sila atoa ua manumalo i faailoga a le kamupani a le The Warehouse lea na faia i se taimi e lei mamao atu.
O Jahkeal mai Otara o se alo o lo tatou atunuu ma na manumalo faatasi ma isi tamaiti e toatolu, o i latou sa filifilia e le kamupani mai le silia i le to‘a 400 na apalai mai i ni avanoa mo i latou e faia le galuega o le faataitaia o meataalo fou poo Toys Testers a le kamupani i masina taitasi. O nei avanoa sa faia mai tamaiti e ta‘i 3 i le 9 tausaga le matutua.
Sa pueina e Jahkeal faatasi ai ma isi ua manumalo nei ni videos o i latou lava ma a latou meataalo, ma faaulu ai i le tauvaga lea ua faamanuiaina ai. O isi tamaiti e aofia ai Frances Williams mai Ueligitone, Maya Satake mai Dunedin ma Casper Prescott mai Ueligitone foi.
O faailoga o i latou nei e aofia ai, le tuuina atu e le The Warehouse mo i latou i masina taitasi mo le 12 masina pe tausaga atoa, o ni meataalo e oo atu i le $200 le tau, e ave mo latou ma fai mai ai ni a latou lipoti mulimuli ane, i itu e fiafia ai ma lē fiafia ai foi i ia meataalo.
O le isi vaega o le faailoga ua malo ai o le malaga fua lea ma nisi o le aiga i Disneyland ma e tusa ma le $15,000 le faatupeina o lea tafaoga, ma na ta‘ua e Jahkeal o se fiafiaga sili lea mo ia.
O se mitamitaga sili lea mo mātua o le alii laitiiti o Jahkeal, o Logan ma Glorya Evalu, aemaise ai foi o ona grandparents o Taituuga Simi & Fialupe Evalu, ma Alan & Alice Vaa
o Otara.
Ona o le taumafai o lenei alii o Jahkeal, e faafetaia ai pea e lona aiga le alofa o le Atua, ma viia ai o Ia ona o lona alofa silisili esela.
Ta‘ua e si ona tamā matua ia Simi Evalu, o se fiafiaga tele mo si ona atalii le maua ai o lea avanoa e malaga ai i le Disneyland, o se nofoaga e lei oo i ai le faitau miliona o tamaiti o le lalolagi atoa.