Momoli le faamalo ma le faafetai i fanau uma o si o tatou atunuu e tusa foi ma seleselega o lenei tausaga sa feagai ai ma aoaoga. A o le viiga ma le faamanu e lē aunoa i le Atua ina ua faaiuina ma faataunuuina taumafaiga ma tauiviga faaleaoaoga a alo ma fanau uma o lenei foi tausaga 2013.
E talitonu foi e toatele ma anoanoai mātua ma aiga ua maua le fiafia ma le faagaeetia i lagona ona o tauamafaiga faaleaoaoga a fanau i totonu o soo se aoga lava, mai lava i aoga laiti seia oo atu lava i le Iunivesite.
O De La Salle o le isi lea aoga maualuga o loo faatumulia i alo ma fanau a si o tatou atunuu, ma o le faaiuga foi o polokalame faaleaoaoga lea na faia ai foi lea o le laugatogi ma maitauina ai le toatele foi o fanau sa faamanuiaina e tusa ma a latou taumafaiga. Ua sa‘o lava le upu masani, “O le tama poto e fiafia ai le tamā”.
O Randal na ia mauaina le faailoga o le tulaga muamua i le Vasega 10 (Food Technology), o le alii o Oscar Faamausili Siulepa na ia maua le faailoga o le tulaga muamua i le tausaga sefulu (Year 10) i le Gagana Samoa, na ia maua ai ma le faailoga faapitoa (Junior Samoan Scholar) ma le alii o Desmond Iuta na ia maua le faailoga o le tulaga muamua i le vasega o le Health, Music & Te reo Maori.
