Fai mai le molimau a le alii o Vaoiva o le alo matua o le faletua ia Faafetai Panoa ua maliu, e faagalogata si ona tina.
O lona tina o le milionea, e lē o se milionea i ni tupe poo ni ‘oa ae mau‘oa i lona loto foai, loto alofa ma agalelei i soo se tagata. O ni molimau na tutulu ai le toatele ona o le agaga alofa faatasi ai ma molimau a ona tuaa ma le toatele o tauaiga.
O le Aso Tofi aso 4 o Iuni na pa ai se alaga ina ua maliu faafuasei le tina ia Faafetai Panoa a o toesea ma lona aiga e faia ana galuega fesoasoani i se tasi o alo o le atunuu sa taofia i le toese. Ua oia le aiga atoa aemaise le ekalesia, le toatele o uo ma paaga aemaise ai lenei leitio Penina o Asuisui ona o ia o se tagata e tausaafia ma faagalogata i ona uiga Alofa e pei ona molimau ai si ona alo. Ua matuai misia o ia e le toatele o tagata ma e talitonu ua iai sona nofoaga i le lagi ma le ola e faavavau.
Pagā se tala faamomoiloto a o tālia le valaau a le faamasinoga ae faafuasei ona maliu ai o ia i se gasegase o le fatu. E tiga ona pisi i ona tuatuagia ae faaavaava lava ona taimi e fesoasoani ai e opogi ma tuu atu lona tau‘au pe faamata e ono tali le faamasinoga i si nei alii talavou a o tuli lona faasalaga.
O se tala faamomoiloto na tatala noanoataga o lenei alii talavou ma magalo mai i tua masalo ua logotala le faamasinoga ua maliu lava si tina ia Faafetai i lona alofa naunau. O le susuga ia Rev Evile Pule (Ekalesia Uesiliana Metotisi Forest Lake) sa taitaia sauniga faaleaiga i le po o le Aso Tofi ae faaiu e le susuga ia Rev Lisatisone Taufao (Ekalesia Uesiliana Metotisi Inala) i le taeao o le Aso Faraile na tea nei.
O le tofa ia Pitoamoa Faamanu Lefua sa fai ma fofoga o le faamoemoe ae fai le fofoga o le ekalesia Uesiliana Metotisi Inala ma sui o le auvalaaulia e momoli se agaga faafetai, le susuga ia Maluseu lea sa faaaogāina ai le Malu ma le Tiafau a le EFKS Southwest, susuga i le Toeaina Faatonu ia Rev Tauaaga & faletua ia Senerita Mataafa.
E tele tala e faamatala ai lea uso agalelei, tausaafia i ona uiga, loto alofa, loto fesoasoani ma le agalelei i soo se tagata aemaise o ana galuega lelei e galue ai e fesoasoani i nisi faagaioiga a lenei leitio pe afai ni faamoemoe tetele. O Faafetai sa faaipoipo atu ia Masivao Alofoe mai Asau ma e toafā le nofoaalo. O ona alalafaga o Sataua, Lotofaga, Moataa, Matautu i Apia ma Falefa. Toe o si ona tina ia Talapepa Lefua, uso ma tuagane o loo soifua a ua maliu si ona tamā.
Na matuai faamalieina le galala o le aofia i le lava tapenaina o le fofoga taumafa sa saunia e le Uncle Sam’s Take Away, afioga ia Papalii Poulava Sam ma Lona Matautia. O le falemaliu a Toomata Funeral Services, afioga ia Toomata Ta‘uo Siaki Valu sa faatinoina toe sauniga o le tina ia Faafetai Panoa.
Ia faamaise le agaga o le Atua ma faamafanafana atu i le tina matua ia Talapepa Lefua, le nofoaalo, Masivao & Taulagia, aemaise le tamā ia Masivao Alofoe ma le fanau ia Vaoiva, Vaelei, Panoa & Alotai Panoa ma le aiga atoa loto faavauvau.
