Sa ufitia i le ao pouliuli le amataga o le tausaga fou i se tasi o aiga Samoa i le pitonuu o Claymore, Sini i Niu Sa Uelese ina ua maliu se tasi o tama talavou e suafa ia Manu Lepa i le Aso Gafua, 4 Ianuari 2016.
O lenei faalavelave na tupu i Leigh St, Claymore lea e toatele le mamalu o le atunuu e aumau ai. I se ripoti a leoleo o loo masalomia le ono maliu o lenei tama talavou i se ma‘i oso ae peitai o loo faaauauina pea sailiga a fomai ma leoleo suesue i le mafuaaga tonu.
Sa taunuu atu leoleo i le nofoaga i le vili atu o nisi o loo faia se misa ae peitai na o le tino o Manu Lepa o loo taatia mai ma faanatinati atu ai loa i le falemai peitai na maliu o ia.
Sa molia ai ni tamaitai se toalua ia Lavona Keys e 33 tausaga ma e toafā lana fanau. O le isi tamaitai o Rexona Sio e 32 tausaga peitai o se tasi o alii na iai i lea taimi na toe faasaoloto e leoleo.
Ua i lalo nei o aiaiga faatulafono (bail) tamaitai nei e toalua e faatali ai lo la faamasinoga ae ua vaaia le gasolo atu o faamaisega a uo, aiga ma ē alolofa atu i le tama ia Manu Lepa.
Sa saunoa foi i luga o le upega tafailagi si ona tina ia Diane Marie Muliaga Vitale i alofaaga mo si ona alo e faapea, “O le a matuā misia lava oe e matou uma, ma o le a lē faagaloina lava oe.”
E toatele foi ona tausoga, uo ma aiga sa momoli a latou faamafanafanaga talu ai o le faafuaseia o lana malaga. E oo lava i le afioga Toaletai David Tua sa faaleoina foi nai ona alofaaga mai Niu Sila mo Manu Lepa, “‘Manuia Lau Malologa Uso, Alofa Atu….MVOA.”
Ua tālia nei le faamasinoga o tamaitai ia Rexona Sio faapea Lavona Keys e faamatala ai toe taimi na soifua ai lenei alo o le atunuu ua faiilagi lana folauga.
