Talofa lava i le suafa mamalu o Keriso lo tatou Faaola. Tatou ave le mua ma le faasagi i lo tatou tapaau i le lagi i lona alofa tunoa ma lona agalelei ua tatou maua ai le ola ma le malosi faafouina i aso taitasi.
O le soifuaga tatou te oo i ai i aso uma e fesuisuiai. O le aso ua lelei o le aso foi ua iai ona masei. O le aso ua lagona le malosi ae o le aso foi ua iai nai faamaimai. O le soifuaga lava lena ae tatou te faanounou manu pea i le Atua o ia na te faafouina lo tatou malosi e pei o le aeto.
Talosia i le alofa o le Atua o mafai ona maua se fesoasoani aemaise o se faalototele faaleagaga e ala i lenei tusitusiga. Faafetai atu i le mamalu o lo tatou atunuu i Ausetalia o loo mafai ona valaau mai ma faailoa mai le agaga faafetai. Ia viia le Atua.
Sa ou taua i se tasi aso le tatou talanoaga ma lenei tusitusiga e foliga mai o se ata tifaga aemaise lava i le Tusi o Faaaliga ona o le tele o taua ma vevesi poo mea o loo tutupu ai.
Fai mai le tala a le isi toeaina ‘Poo le a le lelei o le tifaga ae a le pa le fana e leai se aoga”. Ioe e le moomia le tele o talanoaga ae moomia le faatino.
O le Tusi o Faaaliga o se tusi e mafai ona tatou faapea ‘E tau tele le ata’. Aemaise le vaega o le tusi lea ua tatou oo nei i ai.
Sei toe tepa tasi lava i tua i le mataupu e 16 ma mea na tutupu ai.
• O le uluai agelu sa muamua ma ia sasaa mai i le lalolagi le mala o loo i lana ipu. O le ulauai mala lea mo i latou ua taina le igoa o le Manufeai i o latou muaulu poo latou lima taumatau.
• O lona lua o agelu na liligi ifo e ia lana ipu i le sami (3) ona liu toto ai lea e pei o le toto o le Tagata oti ona mamate ai lea o meaola uma o le sami. Masalo foi e faatusaina i le mala i Aikupito lea na liua ai le vai i le toto (Esoto 8:8).
• O le ipu lona tolu na liligiina ifo e le agelu lona tolu i vaitafe ma vaipuna, na faapea foi ona liu toto uma. Ona faalogoina lea e Ioane o le leo o le agelu e pule i Vai, ua sii atu lana viiga i le Atua (5) ona faailoa mai lea e le agelu le uiga o le mea ua tupu ma le mafuaaga ua sasaa mai ai le toto i le vai. Manatua foi o le toto o le faailoga lea o le ola. E faapea foi le vai o le faailoga lea o le ola.
• O le agelu lona fa na ia liliina mai lana ipu i le la ma tuuina atu i ai ia mu ai tagata i le afi. O le mea o le a tupu fai mai le mau a Ioane na ia iloa ai tagata ua faifai i le suafa o le Atua, a ua le salamo ma avatu le viiga ia te ia.
• O le agelu lona lima na ia liligi ifo lana ipu o mala i luga o le nofoalii o le manufeai ona faapouliuligia ai lea o lona malo. O le pouliuli o se mea faigata ma faafefe tagata aemaise pe afai o loo iloa ua tele ina faaleagaina le lalolagi ma ua tele ina leai ni meaai.
• O le agelu na ia aveina le ipu lona ono ua liligi ifo i le Eufirate le vaitafe tele. Fai mai le mau a le Tusitala o le mafuaaga ua faia ai lea tulaga ina ia mafai ona saunia o le ala o tupu mai nuu i Sasa‘e. O le vaitafe o le Eufirate e afua mai i le mauga o Amenia ma tafe ifo i Asuria, ma agai atu i le nuu o Papelonia. Ona feiloai lea ma le tasi vaitafe tele o le Tikarisi ma tafe faatasi atu i Peresia poo le nuu i Iraq i nei ona po.
O lea la ua tatou oo mai nei i le agelu lona fitu. Ua ia liligi atu lana ipu i le matagi poo le ea. Ona faalogoina loa lea e Ioane le siufofoga ua tulei mai le nofoalii o le malumalu ua faapea mai “Ua uma ona fai”.
O le taimi lea na tutupu ai loa le tele o faititili ma leo eseese, o uila ua feemo atoa ai ma se mafuie tele e le mafai ona faatusaina i ai mafuie i le lalolagi nei e pei ona tatou iloa (Mataio 24:7; 27:54; Isaia 29:6).
O le ipu poo le mala lea lona fitu e foliga mai o loo faasaga tonu lava ia Satani. Manatua foi o ia o le ‘atua o lenei lalolagi’ ma le pule i le vanimonimo (Efeso 2:2).
O le fuaiupu 19 ua vaaia ai le ‘aai tele’ ua vaetoluina. O se tasi nei misitelio poo se mealilo o loo le mautonu ai le toatele o faiaoga popoto o le Tusi o Faaaliga poo ai le aai lea o loo faatatau i ai lenei fuaiupu. O nisi e manatu o Ierusalema, o nisi o Papelonia ae o nisi e manatu o Roma. O nisi e manatu o Papelonia o loo faatusa lea ia Roma ae o nisi foi e manatu o le a toe fausia se Papelonia i luga o le Eufirate.
O le Papelonia o loo taua o le a tuuina atu i ai le toasa o le Atua e ala lea i le to mai le lagi i luga o tagata le uatoa latetele, e faatusaina lea i le mamafa o le taleni. E tusa lea i le va o le 80-110 pauna le mamafa.
O se mea uigaese o le a oo i ai le lalolagi i lea taimi. O le a matua faaleagaina le tele o fale e le gata ona o le malosi o le mafuie ae o maa nei o le timu mai le lagi.
I totonu o le Tusi Paia atoa masalo na o le pau le vaega na tupu muamua ai lenei ituaiga o timu o le taimi lea na taitaia ai e Kitiona le autau a le fanauga a Isaraelu (Iosua 10). Na tauāu ina toilalo Kitiona ona o le malosi o le fili. Peitai na laveaiina e le Atua ona tagata e ala lea i le to mai o se uaga o maa mai le lagi. Ona faaaogaina lea e Kitiona ma ana autau le pelu e fasiotia ai le fili.
E ui i nei mala na oo i tagata, o le tala a Ioane na atili ai ona faifai tagata i le Atua. (21)
E faigata tele i le tagata ona iloa salamo. Masalo ua matua faamaloina lava o latou ua sei tulou.
Ua atili ai le loto faamaaa.
Tatou see atu i le mataupu e 17.
O se tasi o agelu e fitu e pei ona taua i luga ua sau nei ma talanoa ia Ioane ma fai i ai “sau ia, ou te faailoa atu ia te oe le faasalaina o le fafine talitane e sili o le tietie i vai e tele. Ua faitaaga ma ia o tupu o le lalolagi.
O le upu o le faitaaga e sau mai le upu o lona uiga o le ‘faatau atu’. O le faitaaga i le Tusi Paia aemaise le Feagaiga Tuai e iai lona uiga faaleagaga o le faitaaga. O le faitaaga ma le mulilua e faatusa i tagata o le Atua ua avaga faaleagaga i mea o le lalolagi ma le tiapolo.
O loo faatusaina le galuega faatalitane a le fafine e ala lea i le tele o tagata ua tosina atu i le auala ua faatautaia ai le lalolagi aemaise o tapuaiga e pei ona taiulu ai le manufeai. E le o faatusaina i se ekalesia se tasi ae o tagata lolotu ua tuuina atu o latou tino ma o latou loto atoa i le tiapolo. Ua le faamaoni ma le va ma le Atua ae ua faitaaga faaleagaga ma le pule a le manufeai.
Talosia i le fesoasoani mai o le Atua ina ia taofia mai ai le toatele e solo atu i le la faafanoga ma le faitaaga faaleagaga ua mamao ai le toatele mai le Atua.
Soifua ona o Keriso
Lui Ponifasio
