E muamua lava ona sii le viiga ma le faafetai i lo tatou Tapaau i le lagi. O le faasagi e le mavae lea aua o ia o le Mataisau, o le Atua o Foafoaga na faia le lagi ma le lalolagi, o le atulaulau ma mea o tumu ai o a Ieova ia e pei o le Upu a le faisalamo.
E faafeiloai atu foi i le paia ma le mamalu o Samoa o salalau solo i tulimanu e fa o le kelope. Taoto ia faagalu e le fati ou paia Samoa aua e le gafa taulimaina i se faamatalaga aua o Samoa lava ua uma ona tofi ma ona mamalu e tumau.
Faamalo atu le soifua maua le lagi e mama, ua lagona foi e tino le fesuisuiai mai o le tau. Ia o faiga matalasi lava a le Atua o Foafoaga.
Ua iai le faamoemoe o le a faaumaina le tatou talanoaga i le Tusi Muamua a Peteru i le vaiaso nei. O le vaiaso na tea nei na gata ai le tatou talanoaga i vaega e tatau ona usitaia e le tagata Kerisiano, e iloa ai lona fia ola usiusitai i le Afioga a le Atua atoa ai ma le avea o se molimau atu o lona olaga Kerisiano ma lona usitai i le Atua.
O nisi nei o vaega e tatau ona usitaia:
Usitai i le Malo (2:13-17)
O le tulafono a le Malo poo le tulafono o le laueleele e tatau ona usitaia. Sa ou talanoa talu ai nei i se tasi o alii leoleo, na ia taua ai e faapea, ‘O tagata lava o loo solomua ona faia solitulafono o tagata o loo o i le lotu aua o le tele o taimi e moomia ai le fesoasoani a le faifeau.’
E faigata tele e tagata ona talitonuina le mapo lotu o Samoa ae solomusa foi i tatou i le tele o vaega e soli ai le tulafono. Amata i nai tulafono laiti e iai le faia o le laisene ave taavale, aua le paka sese, aua le pepelo ina ia maua le penefiti. O nai mea laiti lava na e te fiu lava e toaga i le lotu e leai se aoga vagana ai ua e salamo i nai vaega faapena.
Manatua foi e leai se mea e tau o le pepelo laitiiti. O le pepelo lava o le pepelo. Ia amanaiaina mea iti o le soifuaga aua o le pu poo le mama itiiti, a le pulutiina, e iu lava ina mama ai le vaa tele. Manatua foi le aoaoga a le Tusi Paia i le faamaoni i mea iti e tofia e pulea mea tetele.
Usitai i Galuega (2:18-25)
E masani ona ou fai i le matou ekalesia, o le fale faigaluega o se nofoaga sili lea ona taua ua tuuina ai oe ma au e le Atua ina ia susulu ai lo ta malamalama, ma ia avea ai i tatou o masina i totonu o le kamupani. Ia avea oe o se tagata faigaluega e sili ona toaga, vave, faamaoni ma alu i le maila faasili e pei ona aoao ai Keriso, ae le na o le faigaluega lava mo le tupe.
Usitai i le Faaipoipoga (3:1-8)
O se tasi o vaega taua e iloa ai le Kerisiano o le tagata, o le iloa lea ona fai lona aiga atoa ai ma le faatauaina o le faaipoipoga. O loo faaulutalaina le mataupu e tolu e faapea, ‘O le amio e tatau i ava ma tane’. E manaia ae maua se avanoa o le ulugalii i se taimi e faitau faatasi ai ma fetufaai i lenei mataupu. O nisi o aoaoga a Peteru mo ulugalii e aofia ai le usitai o le ava i le tane aemaise o tane e le Kerisiano. Ia avea le amio mama ma le faaaloalo e faailoa atu le Atua ae le na o le lauga i ai ae le ogatasi ma le olaga. Ua mafua lea fautuaga ona e tele tina ua liliu i le faatuatuaga Kerisiano, ma avea lea ma ala ua manatu ai ua sili i latou nai lo tane ma ua le fia usitai ma gauai i le toalua.
O se tasi o aoaoga taua a Peteru e faatatau i tane, o le faia lea o le aiga ma le poto ma faautauta i le tino vaivai poo le fafine ma ia ava i lona toalua.
O vaega taua nei o le ulugalii ua faaipoipoina ina ia tausia ma le filemu ma le finagalo o le Atua.
Usitai i isi vaega o le olaga (3:9-12)
O nisi o vaega o le soifuaga lautele e tatau ona mataituina e le Kerisiano. E iai le loto gatasi, fealofani, alolofa i le au uso, mutimutivale le alofa, ia agalelei, aua le taui le leaga i le leaga, ia faamanuia atu, ma le tele o isi vaega o le soifuaga e faailoa ai le uiga moni o Keriso i totonu o le tagata Kerisiano.
O le Sauaina o le tagata faatuatua (3:13-5:14)
Ona faaiuina loa lea o le tusi a le aposetolo e ala i le lapataiga e uiga i sauaga o le a oo i le Kerisiano pe a taumafai e faia uiga lelei. Soo se taimi lava e taumafai ai le tagata e ola usiusitai i le Atua, o le a tele foi le taumafai o le fili e osofaia i soo se ituaiga o auala ma mailei.
O le amio e tatau i le taimi o puapuaga (3:13-17)
O le loto o le tagata e ese le taua i taimi faigata. E tatau ona puipuia lou loto aua e tupu mai ai le amio. A le lelei ona puipuia lou loto i taimi faigata, o le a faapea foi ona e faia ni amio atonu o le a le tusa ma le finagalo o le Atua. O upu masani lava a Solomona ua tatou faalogo soo ai. “E sili lava le toa na te pulea lona loto.”
Muamua fai mai Peteru 1. ‘amuia outou’, 2. aua le fefe, 3. aua le atuatuavale poo le popole. ‘A ia paia le Atua i o outou loto’. O le loto lava e taua ia iloa o loo nofo tupu ai le Atua.
O se tasi o vaega e tatau lava i le Kerisiano ona aua nei galo i taimi o faigata ma puapuaga, o le vaai lea ia Keriso o ia o le faataitaiga sili (3:18-4:6).
Tailo i ou tiga ma ni ou mafatiaga, e le taitai ona talitutusa ma tiga o le Faaola.
E ui na tiga o ia ma puapuagatia, ae na manumalo. E faapena foi oe ma au. E ui lava e tigaina ae iai lava le manumalo pe a tatou onosai. “E lutia lava i Puava ae mapu i Fagalele” ae afai tatou te ainumea i Puava, o le a le taunuu ma maua le manumalo i faigata (4:7-19).
E le gata i lapataiga a Peteru i puapuaga, ae afai o loo e iai i puapuaga i le taimi nei, ‘Ia olioli ai ma ia fiafia ai outou aua a oo i le aso e faaali mai Keriso, ua tofusia outou i ona puapuaga’ (4:13).
E iai taimi e oo mai ai faigata ma puapuaga e le gata i le soifua o le tagata Kerisiano, ae faapea foi le olaga faaleekalesia. E iai lava mea e tutusa e oo mai ai le tiga. Ua faapea foi ona lapatai mai Peteru i lea tulaga. O taitai lava o loo iai le ki ma ua aumaia foi le faatonuga mo taitai i mea e tatau ona fai i taimi o puapuaga (5:1-9). Muamua ia mataala lava e leoleo le lafu mamoe. O puapuaga e pei o luko latou te osofaia le ekalesia.
Ia aua nei faia faapei o e pule faasaua, a ia fai ma taitai ma faaaoao. O le mataupu atoa lava e lima o loo faaautu lea i totonu o le ekalesia i le va nonofo ai o tagata, ina ia maua le ava ma le usitai aemaise lava foi i le tupulaga talavou.
O mea nei e tagai i ai le ekalesia ina ia aua nei maua lava se avanoa e ofi mai ai le tiapolo i totonu o le ekalesia.
Ia maua e tagata uma le loto maualalo. E tetee atu le Atua i e loto maualuga. O a tatou mea e fai faaleekalesia ae a leai se loto maualalo e fai ai, e matua tafilisaunoa le tiapolo aua o ia o le tupuga o le faamaulauga na mafua ai ona tuli ese mai le lagi.
Ia aua nei popole ae ia tatalo. Ia faautauta. Ia mataala. Ia tetee atu i le Tiapolo.
Ona faaiu loa lea o aoaoga a Peteru i ana faamanuiaga ma alofaaga, atoa ai ma le faatonuga ina ia feasogi i le feasogi paia.
E iai le manatu ua matua tele lava ni lesona taua mai totonu o lenei tusi ua tatou aoaoina. Ia faavasega ane e oe poo fea le vaega e tatau ona amata loa i ai au fuafuaga i lona faatinoina. Manatua foi, e pau lava vaega o le Tusi Paia e te talitonu i ai, o vaega e te faatinoina.
Soifua
Pastor Lui Ponifasio
