Malamalama i le Tusi Muamua a Peteru (2)

E avea foi lenei avanoa e faafeiloai atu ma le agaga faaaloalo lava i le paia o si o tatou atunuu, i le mamalu o Samoa i ona tulaga e fia o papa aao ma alaala i totonu o Niu Sila, faapea Ausetalia aemaise o so o se tulimanu o le kelope o loo mafai ona oo atu i ai lenei tautua a le Samoa Taimi.
Talofa lava i le suafa mamalu o le tatou Alii o Iesu Keriso. E iai le talitonuga o loo tumau pea le agalelei o le Atua i lana tausiga i lea aso ma lea aso. O lona viiga e ao pea ona faateleina ma le tea ese i o tatou laugutu e pei o upu a le Tusi Paia ‘o viiga o le Atua o le fua lea o tatou laugutu.’ (Eperu 13)
O le vaiaso nei o le toe faaauauina ai le tatou sailiiliga i le Tusi Muamua a Peteru.
E pei ona tatou iloa mai le vaega muamua, o lenei tusi na tusiaina e le aposetolo ma tuuina atu lea i Kerisiano o loo faataapeapeaina i aai autu e lima o Roma i le Penisula i Asia Laititi lea ua igoa nei ia Take.
O i latou o loo aumau i nuu e iai Pono, Kalatia, Kapatokia, Asia ma Pitunia. O tagata o nei Ekalesia Kerisiano o Nuu Ese atoa ai ma Iutaia. Na tusia lenei tusi a o iai Peteru i Roma i le vaitaimi o le 63AD, a o lei oo i lona maliu i taimi o le sauaga a Roma i lalo o Nero le alii saua ma le le alofa.
O loo taua e Peteru ia Papelonia. E masani ona faaaogaina e nisi e faasino ia Roma i ia ona po. O loo tusi atu Peteru i Kerisiano i totonu o nei nuu ina ia faamalosia lo latou faatuatua ona o taimi ua leaga i le sauaina o le ekalesia Kerisiano.
O se tasi o vaega ua aafia ai foi le ekalesia Kerisiano, o tuuaiga ma upu taufaaleaga ua faia e tagata (4:14-15).
I totonu lava o le ekalesia, ua iai foi uiga ma amio ua faigata ai ona talitonuina le ola faaleagaga ma le talitonuga i le Atua ona ua aafia le Ekalesia e pei lava o tagata o le lalolagi. Ua le mafai ona ola ta vavae le ekalesia ae ua amio e pei lava e le o ni tagata faatuatua i le Atua (2:11-16).
E ese le taua o lenei tusi e fesoasoani tele i le ola faaleagaga. E tele mataupu eseese o loo taua e le Aposetolo, o loo ia faamamafa foi le olaga o le Kerisiano ma tiute o le Kerisiano i aso fai soo.
Peitai o le autu o lenei tusi o loo faatatau lea i puapuaga o le Kerisiano ma sauaga ona o lona faatuatuaga (1:1, 13-21; 2:11-12; 3:14, 17; 4:1, 13, 15, 16, 19).
O tusi a Peteru e aoga e faasino ai le Kerisiano i mea e tatau ona fai i taimi o puapuaga poo taimi e oo ai i mea faigata ina ia:
(1) Taulai pea lana vaai ia Keriso (1:3-12)
(2) Ia mulimuli ia te ia ona o ia o se faataitaiga sili o le tagata e sauaina (2:21)
(3) Ia ola e tusa ma le valaauina a le Atua (2:4-12; 4:1)
I totonu o lenei tusitusiga a le aposetolo o loo matua faatauaina ai lava ia “Puapuaga o Keriso.” O le autu ma le faamoemoe sa laualuga i le aposetolo, ina ia avea le faamanatu o puapuaga o Keriso o le faamalosiau ma faamafanafana lea i le ekalesia Kerisiano. Ia avea foi lenei tusi o se faamalosiau ia te oe ma au i taimi e oo mai ai puapuaga e luitauina ai lo taua faatuatua. O le isi upu e faaaogaina tele e Peteru, o le ‘sauaina’ poo ‘faasauaina.’ (silasila i le 1:5, 7, 12, 13; 4:13; 5:1, 10-11).
Sei o tatou see atu i le vaevaeina o mataupu poo aoaoga i totonu o lenei tusi.
O le vaega Muamua o le faamalamalamaina o le faaolataga o tagata faatuatua (1:1-12)
Ua fanaufouina i tatou ona o lona alofa tele ina ia iu i le faamoemoe ua ola i le toe tu mai o Iesu Keriso nai e ua oti. (3) O le faamoemoe lenei i le lumanai e iai le taimi tatou te toe tutu ai ona o Keriso i lona toe tu manumalo. O lenei le faamoemoe na faamalosia ai e Peteru le au Kerisiano “e ui lava ona faanoanoa o outou i nai aso nei, i tofotofoga eseese’. Ua faatauaina foi e Peteru le taua o le tofotofoga (7). I se isi faaupuga e aoga lava le tofotofoina o le faatuatua e pei o le tofotofoina o le auro i le afi e tea ese ai le otaota ae taatia mai o se maataua tele. Atonu o se soifuaga lea e viia ai le Atua (7).
O le vaega lua o le faailoa mai e Peteru o le faaolataga, e pei ona sailiili i ai perofeta ma o latou valoia (10). Peitai ua faalia mai Keriso e ala i le tala lelei ona o lona Agaga Paia (12).
O le vaega muamua lava ma le taua o le ola faaleagaga poo le ola fanau fouina o le talia lea o le alofa na foai fua mai poo le alofa tunoa o le Atua e ala ia Keriso Iesu.
O le vaega lona lua o le ola faaleagaga poo olaga suia o le tagata faakerisiano ina ua faatuatua ia Keriso, o le taumafai lea e ola mama, ola paia poo le upu masani o le ola faamamaina. Ia faapaiaina mo le Atua i mea uma. (1:13-2:12) Aua ua tusia “Ia paia outou aua o au nei e paia lava au’ (16).
O le ola faapaiaina o le le toe ola lea i le “tuinanau tuai ao valea o outou” (14).
E le gata i le faapaiaina ae tatau foi i le Kerisiano ona ola alofa i le tasi faamaoni (1:22-25). Ia alofa faamaoni i le au uso (22). O le isi lea vaega e faailoa ai le moni o le ola faatuatua poo le ola i le alofatunoa o Keriso, o le alofa i le au uso poo le ekalesia. E iai nisi e fai mai e alofa i le Atua ae le fiafia i le Ekalesia. E le sao lea mea aua o le Ekalesia o le tino lea o Keriso ao Ia o le Ao lea o le ekalesia. Afai e moni lou alofa i le Atua ia faatino lea i lou alofa i le ekalesia poo le au uso. Poo le a le faaletonu o tagata i uiga vaivai ia maua pea le alofa. O le tala a le tusi o le alofa o Keriso i le ekalesia, o lana manamea na ia tuuina atu ai lona ola e sui ai. O le alofa moni lena. Onosai i uiga o tagata ma faaali pea le alofa faaleatua.
O le vaega lona tolu e faailoa le moni o le ola faaleagaga poo le ola faatuatua o le naunau lea i le Upu a le Atua (2:1-3).
Fai mai Peteru o le Upu a le Atua e faamamaina ai i tatou pe o tatou gauai i ai (22). O le upu foi lenei na faaolaina ai i tatou pe na fanaufouina ai oe ma au, o le fua e le pala o le afioga a le Atua lea, ua ola ma ua tumau e oo i le faavavau (23).
E toatele ia o tagata fai mai o i latou o Kerisiano, ae tai tausaga ma faitau le Tusi Paia. E faapefea la ona tupu le faatuatua ma ola faaleagaga. E faapefea la ona faamamaina pe afai e le faitauina le Upu (22). Naunau i le Upu a le Atua e tupu ai lou ola faaleagaga ma lou silafia o Keriso. Manatua o le taimi e te fanaufouina ai faaleagaga ua pei lava oe o le pepe fou, e te moomia le suasusu o le tina ina ia e tupu ma ola. Fai mai Peteru, “faapei o tama meamea faatoa fanau mai, ia naunau outou i le suasusu faaleagaga e le suia, ina ia outou tutupu ai i le faaolataga” (2:2).
O vaega nei e tolu ua uma ona tatou talanoa i ai o loo aumaia e Peteru e faailoa ai ma fesoasoani ai i le tupu ma le ola o lou soifua faaleagaga. Muamua o le talia lea o le alofatunoa o le Atua e ala ia Keriso ma ia fanaufouina. Lua ia ola faapaiaina. Tolu ia naunau i le Afioga a le Atua.
O le vaega lona fa o loo taua e Peteru, o le ‘faia lea o taulaga faaleagaga’ (2:4-10). O le taulaga o se mea e ofoina atu. O se tasi lea o vaega e iloa ai le faatuatua, ae sili ai e iloa ai lou alofa i le Atua. O le auala na faapine ai le alofa o le Atua ia te oe ma au, o le ofoina mai lea o Keriso lona alo e toatasi e avea ma taulaga e sui ai oe (Ioane 3:16).
O le a se mea lelei e te ofoina i le Atua ia avea o se taulaga e faailoa ai lou alofa?
O lou taimi, o lau taleni, o agavaa, o le tomai, o le poto masani, o le aoaoina, o tupe, o au mea totino ae silisili ai lou tagata atoa.
O le upu a Paulo i le ekalesia i Roma, “Ia outou tuuina atu o outou tino i le Atua o le taulaga ola, paia ma malie o le mea lea e tatau ona outou faia (Roma 12:1).
Ia faamanuia le Atua ia te oe i lenei vaiaso a o ofoina atu oe mo ia.
Soifua ona o Keriso
Lui Ponifasio
Pastor