Ua lua tausaga sosoo o siamupini le Malisi Aukilani ile taitoafitu a Malisi Samoa.
E pau lea ole ‘au oloo malaga atu i Niu Sila e tausinio i lea taamilosaga. Ile afiafi ole Aso Faraile na faatinoina ai se faamoemoe ele komiti e faalaeiau ile ‘au taaalo ae lei faasauni atu e tuua le atunuu ile taeao ole Aso Gafua. Ole ‘au lenei e lē gata oloo latou siamupini ile taitoafitu a Malisi i Samoa, ae faapea foi ile taitoafitu a Malisi i Aukilani, lea sa faatoa amata ile tausaga na tuanai nei.
Ole afioga ia Leota Vui Isaako oloo avea ma peresetene ile ‘au ile taimi nei. Na ia ta’ua ile taitoafitu a Malisi ile tausaga ua tuanai nei. “O lo’u faanaunautaiga ina ia unaia le taleni a fanau ma ave iai le lagolago ile itu oloo latou lelei ai.” E to’a 15 le ‘au taaalo faatasi ai ma le komiti oloo malaga faatasi i lenei faamoemoe, e ese mai ai tama tuai ole a malaga e lagolago lenei faamoemoe.
Ole ‘au malosi a Vaiala lea ua faalua ona iloilo ma le Malisi a Aukilani ile sailiga ole siamupini i tausaga e lua ua tuanai. Ole faalua foi lea ona sola mai ma le moa folau le Ipu autu. Oloo iai foi le manatu mauaaluga o tama taalo ole ‘au a Malisi Aukilani e toe omai foi ma le Ipu i lenei tausaga.
Na ta’ua ele taitai malaga ia Lemalu Ben Silva, “Ole faamoemoe a ia ia toe omai ma le Ipu i lenei tausaga. Olea ua iai tama taalo lelei i lenei tausaga mai Fiti ma papalagi oloo filogia i totonu ole ‘au. Oloo iai le tasi o alo Samoa ia Jamie Taulagi sa taalo ile Super Rugby ale Reds ua leva ona faafesootai mai sona avanoa i lenei tausaga e taalo ai mo Malisi Aukilani ile taamilosaga lea, ina ia maua se avanoa e ofi atu ai ile ‘au ale Atunuu.
O lea ua malaga mai e fia auai atu ile taitoafitu ale Malisi. O Peter Toleafoa le tasi o alo Samoa oloo vaai iai le pulega e ono maua sona avanoa e ofi atu ai ile ‘au ale atunuu, pe a lelei lana faatinoga ile taitoafitu ua malaga atu ai nei. Ole tasi o alo ole atunuu o Savelio Ropati sa maua lona avanoa ile ‘au ale atunuu i tausaga ua mavae peitai ole lē mautu o konakarate mo le nofo ai i Samoa sa lē mafai ai ona faaauau, peitai o lea ua toe sii le lima e finau mo sona avanoa.”
“Ole lona fā lea o malaga, ma ua toatele foi nisi o tama taaalo ua saili avanoa mai totonu ole ‘au ale Malisi Aukilani, peitai o lea e filogia le ‘au, e aofia ai le ‘au Fiti ma papalagi, e fua i luga i agavaa e faatino ai le taaloga. Ole faafaigata foi lea ona maua o avanoa ole toatele ona e fua i luga ole lelei ole faatinoga, ae lē ole masani.”
“Ole mafuaaga e ala ai ona filogia le ‘au a Malisi ma papalagi ma Fiti, auā a oo ina siisii le tulaga ole taamilosaga, e tāua le filifili lelei ole ‘au e malaga, ole lelei foi ole taalo ale ‘au Fiti oloo tuufaatasi ma tama taaalo Samoa, ole a siisii ai foi ma le tulaga ole faatinoga a tama taaalo Samoa”.
Ole malaga ale Malisi Aukilani oloo faatupeina uma le kalapu mai a latou seleni sa faaputuputu mai sailiga tupe i tausaga ua mavae. E lua aso o lenei Taamilosaga, e amataina ile taeao o le Aso Faraile 16 Fepuari ae taualuga ile Aso Toonai 17. Ole vaiaso atoa oloo faagasoloina ai pea polokalame ale Malisi Samoa ona ole tausaga lenei e atoa iai le 30 tausaga talu ona faagasolo le taamilosaga taitoafitu ale Malisi. Ose taamilosaga taitoafitu telē foi lea i Samoa ua tele ina lelei mai ai ‘au ale atunuu, ae lē gata i lea ose taamilosaga oloo faaaogāina tele e silasila ai i latou oloo filifilia le ‘au ale atunuu mo le tatou Manu Samoa 7s.
