Mafuta faaaufaipese Uesele – Sinoti Niu Sila i Matu

Na faatumulia Le Metotia Hall, i le aso ananafi a le Matagaluega Metotisi i Papatoetoe i le mafutaga a aufaipese a le sinoti, lea na aofaga potopoto uma i ai aufaipese mai falesa e 24 e amata mai i Hemilitone seia paia Henesone (Henderson). O le faamoemoe autu e pei ona saunoa i ai le susuga i le alii sea o le ekalesia, Rev Vaiao Eteuati o le faatauaina lea o fatuga ma pese na fatuina e uluai tamā o le ekalesia Metotisi, o Sione Uesele ma Sale Uesele. E sili atu i le ono afe pese lotu na fatuina e Sione ma Sale Uesele ma o lea ua pepese ai Ekalesia Kerisiano uma.
O le malo faaaloalogia i lea po o le susuga i le Alii Sea malolo gasegase, Rev Amosa Lene, o se auauna iloga i mataupu tau musika, o ia foi sa avea ma Komiti o Pese Faanotaina a le Ekalesia mo le 32 tausaga. O le susuga ia Amosa Lene sa ia faamasinoina fatuga ma tapenaga a aufaipese faa-Metotisi, ma ia faaalia ai lona lagona fiafia i le mafutaga.
Na ia fia faamamafa foi i lana saunoaga ia taumafai e tapue lava fatuga faa-Metotisi ma tapuai i ai, aemaise o le faaaogaina o le tomai e faaaoga ai a tatou lava mea faifaaili (instruments) faa-Samoa e pei o patē, ae sili ai le faaaogaina o alo ma fanau mo lenei foi taleni.
O le tolu ai lenei o tausaga talu ona faia lenei mafutaga faaaufaipese, e pei ona ae ai se tofa i le Alii Sea, Rev Vaiao Eteuati, ma o loo faatupulaia pea i tausaga uma. E maeu tapenaga eseese a ta okeni, o gaioiga a fuataimi aemaise o togiga matagofie ma le felanulanuai. O le mafutaga foi lea sa tatalaina ai le togiga fou a le aufaipese a Manukau, o loo taitaia e le susuga Rev Kini ma le faletua ia Theresa. “Ou te fai pesega i le Atua, ma ia faaaogaina lo‘u leo ou te vivii ai ia te ia”.