Mafatia faatasi le Wallabies, Soccerroos ma Rudd

O se faaiuga o le vaiaso pogisa na tuanai atu mo le Wallabies i le lami 38-12  a Aferika i Saute, Socceroos na sasa e Brazil 6-0 ma le toilalo o le Labour faapea Kevin Rudd mai le tofi palemia o Ausetalia.
I Perisipeni i le malae iloga o Suncorp na tapuai Ausetalia ia tumau pea le manumalo a le Wallabies i taaloga ma le Springboks ae peitai na suia i le minute lona lima i le sikoa a Coenie Oesthuizen ma sili le Boks 7-0. O isi sikoa mai ia Jean De Villiers, Zane Kirchner ma Willie Le Roux na atoa i ai sikoa e fā na toilalo ai Ausetalia.
E ui o le faiaina matagā a Ausetalia o loo maoae pea le kiki a Chris Lealiifano na maua ai ‘ai e 12 semanu e leai se ‘ai. Ua atoa nei le fā o taaloga sosoo o faiaina le Ualapi ma ua amata foi ona afu malulu le faiaoga ia Ewen McKenzie.
Springboks 38 (Jean De Villiers, Zane Kirchner, Willie Le Roux, Coenie Oosthuizen tries Morne Steyn 3 cons 4 pens) manumalo ia Ausetalia 12 (Christian Lealiifano 4 sala) Suncorp Stadium. Laufali: George Clancy. Tagata Matamata: 43,715.
I le soka na pei lava foi e koleni Brazil i le Socceroo i lana taaloga faaleuo (friendly) na faia i le aai o Brasilia ina ua lami e 6-0. E pei ona silafia o Brazil ua faalima (5) ona siamupini i le Ipu o le Lalolagi i le Soka ma na uluai sikoa i le minute lona fitu, luasefululua ma le tolusefulutolu. E ta ifo le ‘afa ua tolu Brazil i le leai a Ausetalia.
E lei faaitiitia le toatamai o Brazil i le ‘afa mulimuli ina ua toe sikoa Ramirez i le minute lona limasefulufitu, Alexander i le minute fitusefulutasi ae taualuga e Luis Gustavo Pato i le toe valu minute uma le taaloga mo le 6-0. O le itu pagatia e uma le taaloga e lei iai se avanoa o le Socceroo e taunuu ai sa latou osofaiga i le pusa a Brazil.
I Ausetalia nei na iai le faamoemoega o le Labour ma Kevin Rudd e ono faaleaogaina faamaumauga (polls) na vaaia ai le sili o le soofaatasi a le Liberal ma le Nationals i toe itula o le palota ae peitai na manumalo lava le Soofaatasi ma suia ai le faigamalo ma le Palemia fou o Tony Abbott. O se taimi aupito faanoanoa mo i latou na lagolagoina le Wallabies, Socceroos ma le Labour.