E lē mafai lava ona tuua tulaga faagasolo o le galuega i totonu o Ekalesia taitasi e pei ona sa faataunuuina le faiga suega masani o le tausaga a le Aoga Aso Sa, AOG Church of Samoa, ile taeao ole Aso Toonai 28 o Iuni, e pei ona masani ai le ekalesia aoao i tausaga uma.
E ui lava ina tetele le malulu peitai sa lei faafiti ai lava le faataunuuina o nei vaega tāua o le galuega a le Atua. E moni lava upu o Afioga Paia a le Atua, “A‘oa‘o le tama e tusa ma ona ala, a oo ina matua e le toe tea ese ai”.
O le fatu lava na totō a o itiitii e oo lava ina matua e olaola pea ae faafetai o loo maua pea avanoa e sailiili ai ma faailoa Afioga mamana a le Atua i alo ma fanau tuputupu a‘e a soo se ekalesia ma le atunuu.
Na iu manuia mea uma i le luluina o le saito i le Aso Toonai ma toe atofaina ai le taeao o le Aso Sa, 30 o Iuni o le aso lea o le seleselega na fuafuaina ma faataunuuina ai laugatogi. O le fua lava sa luluina o le fua foi lena na toe seleseleina. O le tama poto e fiafia ai le tamā a o le tama valea e faanoanoa ai le tina.
Na malaga mamao mai lava sui ma le ofisa o Aoga Aso Sa a Ausetalia mai Melepone ma Sini e faataunuuina lea vaega tāua.
I le mae‘a ai o le taumafataga tele sa faia i le maota o le taitai ina ua mae‘a le sauniga ma le laugatogi i le Aso Sa, ona toe taliu loa lea o le uto a le au ofisa o Aoga Aso Sa e pei ona talimalo ai le Ekalesia a AOG Church of Samoa a Kuiniselani.
Taitai aoao o le Ekalesia AOG Church of Samoa i Ausetalia: Ps Taeauga & Saeseese Ropati Frost. O le Peresetene Aoga Aso Sa: Ps Siliana Laussen. Failautusi: Ps Kirisimasi Hytongue. Teutupe: Ps Tavita Anitipa.
