Ua mae‘a faatauto sui o Local Boards o itumalo taitasi o Aukilani e pei ona faagasolo i vaiaso ua mavae.
O sui ole itumalo o Magele-Otahuhu sa faia lea ile Metro Theatre i Massey Road, ile Aso Lulu, 26 o Oketopa, ma e toalima sui ole Pasefika oloo iai; ole tamaitai o Lemauga Lydia Sosene, Tafafunai Tasi Lauese, Walter Togiamua, Tauanuu Nick Bakulich ma Makalita Kolo.
O Otara-Papatoetoe sa faia ile Civic Building i Manukau ile afiafi ole Aso Gafua, 30 o Oketopa lea oloo auai Apulu Reece Autagavaia ma Lotu Titi Fuli.
O Maugakiekie-Tāmaki na faia le latou sauniga ole faatautoga ile afiafi ole Aso Tofi, 3 o Novema i Te Oro Art Centre i Glen Innes, lea oloo iai sui ole Pasefika ia Josephine Bartley ma Nerissa Henry.
Ole itumalo o Whau oloo tulai mai ai le tamaitai, Afioga Ulalelemamae Teeva Matafai na faia le latou sauniga ole faatautoga ile afiafi ole Aso Lulu, 2 o Novema ile Community Centre i New Lynn.
O nei sauniga uma na maitauina ai le lolofi fiafia atu o aiga faapea uo ma ē masani, e molimauina le faatautoina o i latou ua filifilia e faatautaia puleganuu i totonu o Aukilani mo le isi tolu tausaga.
Ua lē gata i tagata Pasifika ae o tagata foi mai isi atunuu e pei o Initia ma Saina lea foi ua iai o latou tagata na manumalo mai ile palota. Ole tele o nei sauniga o susuga lava i faafeagaiga Samoa sa latou taitaiina e momoli le faafetai ile Atua ona o faamoemoe sa fau ao fau po ae o lenei ua mafai ona faataunuuina ma le manuia.
Ae lē gata i lea o molimau ma tautinoga a sui taitasi o nei itumalo na faafofoga iai le mamalu ole atunuu, ua tautino ai ise lelei ma le atoatoa ole tiute ole a latou finauina ai le malo auā se manuia lelei o nai o tatou tagata aemaise ai ole taugata ole soifuaga oloo iai.
E tolu tausaga le umi ole nofoaiga mo i latou nei lea ua mafai ona faamanuiaina i ia nofoa taitasi. O nisi o sui o itumalo oloo manumalo mai i nofoa nei o tagata sa iai muamua ae o nisi o nofoa o sui fou lea e tusa ole 40% o i latou na manumalo, o Sui fou uma.
Ole mae‘a ai foi o lenei faatautoga ma maua ai se tala fiafia mo tatou tagata Pasefika aemaise lava io tatou tagata Samoa ona ole filifilia o nisi o tamaitai Samoa i tofi taitaifono i o latou pitonuu, e pei ona filifili ai Lemauga Lydia Sosene e avea ma taitaifono ale Local Board a Magele o lona taimi lona lua lea ua seei mai ai i lea nofoa ole taitaifono, ae o Josephine Bartley lea ua tulai mai ile tofi taitaifono ale Local Board a Maugakiekie-Tāmaki ma ose taimi muamua lea ua ofi ai lea tamaitai Samoa i totonu ole puleganuu a lea itumalo ae o lea ua avea ma taitaifono.
E faapena foi ile tamaitai ia Lotu Titi Fuli i lona taimi muamua ua tulai mai ai ile avea ma sui o Otara-Papatoetoe ae o lenei foi ua seei mai ile tofiga ole taitaifono o lea itumalo.
Ose matatia ua ausia e o tatou tagata Pasefika aemaise lava ia tatou Samoa le siitia maualuga ole tulaga o tamaitai Samoa i totonu o Aotearoa. Tatou te mitamita ai lava ile saili malo o o tatou tagata i nei atunuu oloo tatou aumau ai, ma e moni ai le upu ale atunuu, ‘E au le inailau a tina.’
Ile toe tulai mai ai ole tamaitai o Lemauga Lydia Sosene ile taitaifono ole Local Board a Magele-Otahuhu ose fiafiaga tele lea ia te ia ona ose avanoa o lea ua mafai ai ona ia toe finauina nisi o anavatau lelei ma mea totino mo lona itumalo o Magele ma i lona talitonuga ole toaga lava e tu‘itu‘i e tatala mai ai le faitotoa.
