E ui ina fesuiai le tau i le aoauli o le Aso Sa, aso 6 o Aperila, peitai sa lei faafiti ai le toatele o le atunuu i le lolofi atu e fia faamalosiau ia Alex Leapai a o loma lana fusuaga i lenei masina.
Sa vaaia ai le agaga lototele o le susuga ia Alex a o maua ai lea avanoa sa feiloai atu ai i nisi sa auai atu. Sa logomālie se feau o se luitau na saunoa i ai le taitaifono o le LMS Pasekfika a Kuiniselani, le susuga ia Rev Afoa Alapati Meatuai Tuuga Stevenson. Sa faafofoga foi i ni saunoaga logomālie mai si ona tuaa ia Faatau‘ī Leapai faapea nisi sa auai.
Ua iite fanua a lalo ua lē o toe iai se taimi, ae moomia lava e le alo o le atunuu, o le tamafanau a Samoa au talosaga Samoa ina maua ai e ia le mafanafana auā o le taua e fai toatasi lava na o ia faatasi ma le mana o le Atua.
Ua faailoa mai e le Federal MP a Rankin o le a faaalu le fusuaga a Alex i le Lion Club i Springwood mai le 7 i le taeao o le Aso Sa, aso 27 o Aperila auā maimoaga a le atunuu ma tagata lautele i Brisbane.
Se‘i tatou manatua pea Alex i talosaga ina ia a‘e manuia lona taumafai auā se ‘ai o Samoa i tafa e fia o le lalolagi.
