Ua oo ane matua o le aoga laitiiti a Fusi i le Matagaluega o Aoga e fesiligia pe aisea ua oo atu ai i le lua vaiaso e le o toe iai se faiaoga e aoaoina le Vasega Ono (6) a le Aoga i Safata.
Na faateia le Matagaluega i lea savali ona e lei iai se malamalama ua le o toe iai se faiaoga i le vasega lea a le Aoga.
O ina na maua ai e le Matagaluega, ua faiaoga nei le alii na faiaoga i le Vasega Ono i le aoga tulagalua poo le aoga laitiiti a le afioaga o Saanapu.
O le alii faiaoga lenei, na tulai mai ai se feeseeseaiga i le afioaga o Fusi ona o le faaoolima o le faiaoga lea i se tamaitiiti o lana vasega.
Faaalia e matua o le aoga na fasi fasi le tamaitiiti, aafia ai le lima o le tama aoga ma iu ai ina agai matua i le Ofisa o Leoleo ma faaulu le tagi faasaga i le faiaoga.
E ui o lea na toe oo ane lava le vasega o faiaoga o le afioaga o Fusi ma faatautaia se faatoesega faasaga i le aiga o lea tamaititi.
O le faaiuga o ia feiloaiga ma le faatoesega a faiaoga na toe talosaga le aiga ma faaui ai i tua le tagi mai i le Matagaluega o Leoleo.
O le lua la o vaiaso talu ai na ta‘ua ai e le aoga i matua ma sui o le Aoga o lea ua iai se isi aoga ua agai i ai le faiaoga lea (transfer) ae talu mai lea taimi e lei toe iai lava se faiaoga e faatautaia ma faaauau le auaunaga a le faiaoga ua alu ese.
O le fesootai atu la o sui o matua o le aoga i le Matagaluega na faaalia ai e le Matagaluega e lē o iloa poo anafea na faia ai lea faaiuga e siitia le faiaoga lenei i Saanapu ae o le a foi le mafuaaga ua alu ese ai mai i lona tofiga i le aoga laitiiti a Fusi. O le tamaitai o Manutagi Tiotio, o le Ofisa Sili Lagolago o le Matagaluega o Aoga na tau atu i ai le savali a matua o Fusi ma na ia faaalia, soo se faiaoga lava e fai i ai se faaiuga poo se faasalaga a le Matagaluega o Aoga, o ia tonu e ui atu i ai lea faaiuga, ma o ia e nafa ma le tusia o tusi e faamaonia ai le faasalaga ua faia poo le faaiuga foi e siitia se faiaoga ona o mataupu faapea.
Na faateia le tamaitai Ofisa Sili Lagolago ona e lei lotea lava se mataupu i se faaseā a ni matua mai i Fusi, a o le siitia ese foi o le faiaoga.
Ua taatia atu nei la le mataupu i le Matagaluega mo le talanoaina aemaise o le vave saili ane o se tasi e faaauau le auaunaga faafaiaoga mo le Vasega Ono a Fusi lea ua leai se faiaoga.
E le o iloa foi poo le a tonu le vasega lea ua faiaoga ai nei le alii faiaoga lea ua alu ese e suafa ia Oleni Taavale i le aoga tulagalua a Saanapu.
Ona pau lava lea o le auala e mafai ai ona faia ni faaiuga faapea e pei ona saunoa i ai Manutagi, ma o le a fesiligia foi le Asiasi Aoga o lea itumalo i se faamalamalamaga i lea faaiuga ua faia.
O le atugaluga o sui o matua e pei ona oo atu ai i le Matagaluega, ona e foliga mai ua aveese le faiaoga lenei ona o lana faaoogalima na faia, ae ua foliga mai ua faasala ai ma le fanau i le faitio ma leai ai ma se faiaoga a o lea ua faamagalo e matua ma ua toe faaui i tua le tagi i le faaoogalima na faia faasaga i le tamaitiiti aoga o Fusi.
