Lotonuu moni Lorence Tauasa, fusu mo le igoa o Samoa

O le fitu o tausaga o le alii fusu o Lorence Tauasa na malaga ese ai ma Samoa ma ona matua aua se sailiga manuia i atunuu i fafo.
Ua 29 nei ona tausaga ae ua avea lana fusuaga faapolofesa muamua i Samoa ma faitotoa ua le mafai ona tapunia ai lona fia nofo i le atunuu ma atinae ai pea lana taaloga o le faipele, lea na amata fofoa mai i Ausetalia ma ia umia ai nisi o fusi o le siamupini i le paga o le cruiser-weight a le WBO ma le IBF.
“Fai mai tagata ia te au e le lelei Samoa, ae ou fai atu i ai, e sili atu Samoa e lelei fale koleni ma o loo iai foi tagata agavaa e avea ma promoters”, o se lagona faaalia lea o le alii ina ua faatalatalanoa e le tusitala, faatasi ai ma lana Manager le tofa, Fanaea Too Taito Galu, a o lei tuua le atunuu mo Niu Sila aua le faamoemoe o ia o se isi paga (undercard) mo le fusuaga tele a David Tua i le faaiuga o le vaiaso.
Ua faafetaia ai e Lorence le susuga David Tua i le filifilia o ia e avea ma se tasi o paga faapitoa mo lana fusuaga autu, aua o se avanoa ua siitia maualuga ai foi lona taumafai i le taaloga o le fusu i le vaavaai atu a isi atunuu aemaise o tagata fufusu lauiloa o le lalolagi.
Sa umia e Lorence le fusi o le siamupini o le paga o le cruiserweight a Ausetalia, ae o le tausaga na tea nei na ia toe tauaao atu ai le fusi lea ua umia nei e le alii o Daniel Amman o Ausetalia o le a la toe fetaui.
Ua filifilia e le alii o Lorence le fetalaiga Fanaea Too Taito Galu le pule o le kamuapni o le Zero Management o loo saunia faa-a-u o alatetele i Samoa faapea ma faailoilo, e avea ma ana taitai malaga poo le Manager, ma ia tauaveina foi le tulaga o le faalauiloaina o ana fusuaga i Niu Sila.
O se fiafiaga lea i le tofa Fanaea Too ona ua avatu le faatuatuaga o lea tamafanau a le atunuu ia te ia ma lana kamupani, aua e toatele foi isi tamalii ua lauiloa i le faiva o le faalauiloa poo le Promoter, ae ua faatuatuaina lava o ia.”
O se fiafiaga lea ia te a’u, aua o se taimi muamua lenei ua ou aafia ai i se taumafaiga faapenei”, o le finagalo lea o le tofa Fanaea Too i se talanoaga ma le tusitala.
O le tulaga i tapenaga uma o le malaga mai i Niu Sila a Lorence o loo lagolagoina malosi e nisi o kamupani i Samoa e pei o le SamoaTel, Polynesian Shipping ma le JP Fitness i Vaimea.
O le kamupani lafo tupe o le Pacific Eazy Money Transfer i Niu Sila a le tofa Faimalo Allan Stowers o loo lagolagoina isi tapenaga uma.
E leai se isi faamoemoe o Lorence ma Fanaea o le manumalo lava ia ausia ile fusuaga ma Daniel Amman, ae o loo talosia ia iai faatasi ma le tapuaiga a Samoa atoa o le a auai ma i latou o loo tapuaia mai faiva i le atunuu ona manuia lea ma taunuu le faamoemoe.