E tele le sao o tagata faipisinisi mai fafo o loo faagaioi a latou pisinisi i lo tatou atunuu. Muamua o galuega mo o tatou tagata, lona lua e alu seleni o a latou lafoga totogi i le tamaoaiga o le atunuu.
O le molia e leoleo o se alii faipisinisi Saina e faafoe sona faleoloa i se vaega o Lelata i lona faatino o se faigaaiga fai faamalosi ma se teineititi 16 tausaga sa ia faafaigaluega, ua tele ai manatu ma lagona faaalia o nisi ma ua tuua‘ia ai le toatele o tagata Asia, aemaise tagata faipisinisi mai Saina ua talia i le atunuu.
O le molia o lea alii Saina ua faaalia e le sui sooupu o le Matagaluega o Leoleo ma Falepuipui le afioga Leaupepe Fatu Pula, o se logo tatagi leotele mo mātua o fanau teine o loo faafaigaluega e tagata mai Asia. “O se tulaga e ao lava i mātua ona mafaufau loloto i ai, ia aua ne‘i soona tuulafoai a latou fanau teine ona o galuega ae aliali mai ai ni tulaga faapea”.
O Amerika Samoa i tausaga ua tuanai sa aliali mai ai ni faiga solitulafono na aafia ai ni tagata Asia e fai a latou pisinisi i lea vaega o Samoa. O nisi o alo tamaitai laiti ma talavou mai Samoa tutoatasi sa faafaigaluega i ia pisinisi e pei o faleaiga e iai ma falepia. O nisi sa faigaluega i faletalimalo sa faafoe e ni
tagata Asia.
Na faatino ai e ia tagata ua mae‘a ona molia i le tulafono ma ua faasalaina nisi, ni gaioiga sa faaaogā ai ia tamaitai laiti i ni feusuaiga fai faamalosi ma nisi o tagata sa faaaogāina ia pisinisi. O popolega foi ia o loo tulai mai, ina ne‘i sosolo mai ia faiga i lo tatou atunuu.
O le teineitiiti na aafia i le solitulafono a le alii Saina faipisinisi ua molia nei, na faailoa mai e Leaupepe e nofo i Magiagi, ae o le lua o aso talu ona faafaigaluega e le alii faipisinisi na ave ai e lē ua molia i se tasi o ona fale nofo ma faatino ai le solitulafono.
O le Aso Gafua na tea nei na tulai ai lea alii Saina i le faamasinoga maualuga, ae peitai ua toe tolopo le tuuina atu o sana tali i le moliaga se‘i mae‘a suesuega a leoleo ma faamautu moliaga. E lei faaalia e Leaupepe Fatu Pula pe toe iai se isi moliaga e faaono molia ai lē ua tuua‘ia.
O le aliali mai o lea mataupu na faaalia e se tasi o faipule o le Palemene, e le tatau ona soona tusitusilima ai i nai tagata Asia o loo faia a latou pisinisi i le atunuu, auā e lē na o Samoa e tutupu ai ia solitulafono ma aafia ai ni tagata faipisinisi mai fafo. O le mau a lea faipule ua musu e faailoa lona suafa, e aogā tele pisinisi a tagata mai fafo o loo faatino i Samoa, ae a oo loa ina aafia i ni faaletonu e soli ai tulafono a le Malo, e lē tatau ona tuua le mea e tatau ona faatino o le faia o suesuega a leoleo ma tuuina atu se mataupu i le faamasinoga e iloa ai le mea tonu ma le moni.
