Ua faamanino mai e le afioga i le Fofoga Fetalai o le Palemene le susuga Laauli Leuatea Polataivao, mafuaaga o lona lē auai faatasi ai ma nisi o le Malo i toe sauniga o le tofa Leafa Vitale, o se tasi sa avea ma Faipule o le Palemene ma sa filifilia foi i le Kapeneta.
Ina ua maua se avanoa o le tusitala i lana afioga a le Fofoga o le Fono le Susuga a le Laauli a le Malietoa, na fesiligia ai e uiga i lenei mataupu.
A o le saunoaga manino a le Fofoga Fetalai, o faiga masani a le Palemene ma e faapea foi ona faaauau mo le fetalaiga a Leafa Vitale, talu ai ona o lea ua matuā faamaonia le solitulafono matuia na aafia ai lenei sui a o avea ma minisita o le Kapeneta.
Saunoa le Susuga Laauli, soo se tasi ua faamaonia le aafia ma le faatinoina o se soligatulafono a o avea ma sui o le Palemene, o le a faaleaogaina uma ona tofiga ma o le a lē toe agavaa foi ona faia i ai se faaaloaloga faale-Malo pe tauaaoina foi i ai le tagavai o le Malo o Samoa e pei ona masani ai.
Lea foi ua mafua ai ona taofia mo le fetalaiga a Leafa ma e lei faatinoina foi ia faaaloaloga i le fetalaiga a Toi Aukuso Cain. Peitai, i le falelauasiga o le tofa Leafa Vitale, na saunoa le susuga a Laauli sa iai lana fuafuaga e auai lava ia e momoli lana meaalofa, peitai sa malaga i Savaii i se tasi foi maliu.
Na feiloai le sui tusitala ma se tasi o Matai o le afioaga o Malie e lē o manao e faailoa lona suafa, na ia tuuina mai ai sona lagona i lenei mataupu e faapea, “Masalo ai lava o tumau le lē fiafia o le Malo i le fetalaiga a Leafa i le mea na tupu, ua ala ai ona solitu ma ua lē auai mai ai i toe sauniga.”
Peitai ua manino nei le mata o le vai ina ua aumai le finagalo o le Fofoga Fetalai e pei ona tapa e le nusipepa.
O loo faamauina e se sui o le Samoa Times nisi nei o moomooga ma saafiafiga o le Tofa Leafa Vitale, na ia tusia i totonu o le Falepuipui i Tafaigata i le tausaga e 2000, a o taofia ai e faatali se faasalaga o le a tuuina atu i ai e le Faamasinoga Maualuga a Samoa, e afua mai i le faalavelave na tagatavaleina ai ma maliu le afioga ia Luagalau Levaula Kamu, o se tasi foi o Minisita o le Kapeneta.
O nisi nei o pese e lua sa tusia e Leafa Vitale a o tuli lona faasalaga.
Pese 1: (O lana pese na ia tautino ai o ia o le Pagota talu lana mea leaga ua fai)
O Iesu lava o Ia lava na togisala,
Ina ia magalo le pagota mai le leaga.
O Iesu lava o Ia lava na togisala,
Ina ia magalo le pagota lotomaaa.
Tali: Ia viia pea le Atua e ona lona mana,
Auā o Ia ua na faamagaloina la‘u agasala.
Atonu e iai se aso ou te tuua lenei nofoaga,
Ae foi atu ia Iesu ma lana Faaolataga.
Musumusu Satani i le tagata ia leaga,
A o le Agaga Paia e musumusu ia e manuia.
Musumusu Satani i le tagata ia leaga,
A o le Agaga Paia e musumusu ia e manuia.
Pa‘ū a le popo uli e pa‘ū ma toe tupu,
Pei o Iesu na maliu ma toe tu.
Pa‘ū a le popo uli e pa‘ū ma toe tupu,
Pei o Iesu e maliu ma toe tu.
Toe taimi o lo‘u Alii i luga o Korokota,
O pagota e toalua na faafeaoina le Faaola.
Toe taimi o lo‘u Alii i luga o Korokota,
O pagota e toalua na faafeaoina le Faaola.
O le pese lena na faailoa ai e Leafa lona talitonuga ua faamagaloina lana agasala. O upu o lana pese lena o loo tautino ai Leafa, o le pa‘ū a le tagata ona o le agasala e pei o Ia ma le mea na ia faia, ua ia faatusaina i le pa‘ū a le popo uli e mafai ona toe tupu.
O loo faatatau foi e Leafa le pa‘ū a le tagata ma le popo uli e toe tupu, e pei foi o le taimi na maliu fasia ai le Alii Faaola o Iesu ma tanumia i le tuugamau ae na toe tu manumalo a‘e lava mai le Oti.
O le maliu foi o Iesu na taualuga i luga o le Koluse i le Mauga o Korokota, na faaamuia ai Leafa i pagota e toalua sa i le itu taumatau ma le itu agavale o Iesu auā fai mai Leafa, o nai uso pagota na sa o la faafeaoina le Faaola.
Pese 2: (Pese aualofa mo Kale le fafine na faavalea i ai le loto o Leafa Vitale)
Ou te manatua ta evaga,
E ta‘ape ua tafa mai o ata
Ta feoai i le taavale, i Sisifo agai i Sasa‘e.
Ae ui i lea ou te lē kea, i tala a tagata e fai mai pea,
A o lo‘u alofa ua tumau pea, mo oe honey i soo se mea.
Tali: Oi! Auē ta lē lavā. Se mafutaga ae tetea,
E tumau pea le faamoemoe, i le fia faatasi pea ma Oe, E iai se aso e faia e le Atua, E toe feiloai ai ta‘ua.
Lele le toloa i tafailagi, Ae maau i le vaivai,
E faapena lo‘u alofa ia Oe, Kale la‘u pele e toatasi,
Ae pule pea le Tamā oi le Lagi, Auā o lana pule e fai toatasi,
Na faia ai Atamu ma Eva, Palealii lea o ana galuega.
Tu faasipa mai le aniva, Pito tasi ane o le masina,
O‘u manatua ou foliga i le ‘emo lausosoo mai o le uila.
Ou te talitonu i le Tusi Paia, Auā o mea uma ia na ia faia,
Mo i ta‘ua lana fanau, Ia ta maua le Ola e Faavavau.
Nofo toatasi ita i le Toese, Ua ou misia lava oe la‘u Pele,
O nisi aso ou te faama‘ima‘i, O‘u manatua Oe la‘u Honey,
E lētioa le Poto o Solomona, I le faigata tele o le alofa,
Ae sau ia ta faatofa, Kale Leafa ia e manuia!
O le isi lena pese na fatu e Leafa i totonu o le Falepuipui, ua sasaa atoa atu ai lona alofa faavalea mo Kale le manamea ua tasi moemoe i lona loto, lea ua oo ina tuumalo a o la faatasi pea.
Sa taumafai le sui o le Samoa Times e saili sona avanoa i le Alii Palemia, sa fia fesiligia pe iai se fuafuaga a le Malo i se faiga e manatua ai foi lenei auauna sa i totonu o le Palemene ma le Kapeneta o Samoa, e ui ina sa matuā matilatila ma faamaonia se soligatulafono matautia na aafia ai lenei sui sa avea ma Minisita o le Kapeneta o le Malo o le atunuu.
I se molimau faatuatuaina na ia faailoa maia i le sui o le Samoa Times e faapea, e faalua ona taumafai mai le alii o Eletise Leafa e fia maua sona avanoa i le Alii Palemia, ma e faapea se faamatalaga, sa taumafai Eletise e talosagaina le Palemia e uiga i se fesoasoani a le Malo i le Aso o lona tamā.
