“Fai i ai e sue se isi nofoaga e faatu ai le latou lotu, o le a faatu foi la‘u lotu,” Susuga Joe Leauanae
O faamatalaga nei na saunoa ane ai le alii o loo vaaia nei le Aulotu a le Ekalesia Penetekoso i le afioaga o Iva i Savaii ina ua tapa sona finagalo i le faatonuga ua tuu atu e le Ekalesia Penetekoso i Samoa e see ese ua iai se faifeau o le a tausia le lafumamoe i lea afioaga.
O le toatamai tele o lenei alii ona o lea e lei iai ma se upu aloaia ua oo atu mai i taitai o le Ekalesia i Samoa ma Amerika Samoa e faatatau i le faaiuga ua tuu atu nei ia te ia e ni sui na asia le afioaga o Iva.
E lei iai i le fono tele lea na faapea ona usuia i Amerika Samoa lea na faia ai le faaiuga e pei ona ta‘ua. O le faamatalaga o lenei mataupu e faapea, o le fanua o Joe Leauanae lea e faatu ai le lotu lea a le Penetekoso i le afioaga lenei i le Faasaleleaga ma o lona tina ua maliu na feutagai ma le ekalesia ma faapea ona ofo ai le fanua o lea aiga mo le faatu ai o le malumalu tapuai a lea aulotu.
Ae ua lē pei le maliega lea o le faamatuu atu o le fanua ma isi maliega ua vaaia i totonu o le atunuu talu ai ua leai se faifeau tausinuu e agai atu i Iva ae ua faatautaia lava e le susuga Joe Leauana lotu a le latou ekelasia ma ia vaaia ai lava le aulotu lea e i Iva.
O lea la ua suia le mafaufau o le ekalesia i lana fono tele na usuia nei i Amerika Samoa ma le finagalo e tatau lava ona iai se faifeau faauuina latou a le ekalesia na te tausia le aulotu i Iva.
E lē o sao la le finagalo lea o le ekalesia i le alii e ana le fanua ua faatu ai nei le lotu ma o lana faamatalaga poo le ā le finagalo ua autasi i ai le ekalesia Penetekoso, e le alu ese ma lona tofiga ma o le taimi e alu ese ai ma le tofiga o le a lē toe iai loa se Ekalesia Penetekoso i totonu o le afioaga.
Ta‘ua e lenei alii afai o le a o ese le ekalesia Penetekoso ma le fanua lea atoa ai ma le malumalu, o le a agai loa e faatu sana ia aulotu ma o le a sui foi le igoa e faaigoa ai. Ua agai sui o le Ekalesia Penetekoso ua teena e Leauanae i le pulega a alii ma faipule o le afioaga.
O le faamatalaga a le afioaga, ua iai nei se tapu ua faamamalu a Iva e lē toe talia ai lava se isi lotu. O le Ekalesia Penetekoso, ua valu i ai ekalesia eseese ua talia ma aloaia i totonu o le afioaga. O le Ekalesia Faapotopotoga Kerisiano Samoa (EFKS), Ekalesia Katoliko, Ekalesia Asofitu o le toe Afio Mai, Ekalesia Asofitu Tutoatasi (SISDAC).
Na ta‘ua e le sui o le nuu (Magele Taumaloto), na uia e sui o le ekalesia (Savea) e faapea na oo atu nei tamalii mo se finagalo o le nuu e tusa ai ma le mataupu. “Ua mae‘a ona poloaia le susuga ia Joe e tusa ai ma le mataupu, peitai e faatuiese o ia. O lana saunoaga e faapea e leai se isi e aveesea o ia ma lona tofiga faaletaitai o le ekalesia”.
“O le finagalo a lana susuga e faapea, afai foi o le finagalo lea o le ekalesia e sui se tofi, e mafai ona tuu atu le tofiga a le ekalesia ae lē mafai ona ou alu ese ma lona eleele,” o le saunoaga lea a Savea e tau faamatala ai le manatu na faaoo ane e le Susuga ia Joe.
“O le iugafono foi a le nuu ua mae‘a ona pasia i le 2011 e lē toe talia se isi tapuaiga fou e fia faatuina i totonu o le nuu,” o le saunoga lea a Magele.
O le ekalesia na mulimuli atu i lea lava afioaga o le Ekalesia Aso Fitu Tutoatasi ma o ina na amata mai ai le tapu na faia e alii ma faipule o le nuu. Faaalia e Joe Leauanae e faaaloalo i le nuu ma le faaiuga lea ua faapea mai e lē toe talia se isi lotu fou i totonu o le nuu ma o lona atugaluga i alualu lenei mataupu iu foi i le Faamasinoga.
