Oloo faagasolo suesuega a leoleo ise mataupu ua iu ai le soifua ose tina talavou ma ua lē aulia ai ele tina lo latou Aso Sa faapitoa sa faamanatu i Samoa ma le lalolagi atoa i lena faaiuga ole vaiaso ua mavae. Faaalia ele sooupu ole Matagaluega o Leoleo oloo masalomia na faaoo ele toalua ole tina ua maliu ni manu’a i lona toalua.
Na auina atu ile falemai i Motootua mo togafitiga ma maliu ai lava.
“Ua taofia nei le tamaloa mo suesuega ma oloo molia ile taimi nei i moliaga ole faaoo manu’a tuga, ae ole a iloa nisi moliaga faaopoopo pe a mae’a suesuega. E le o iloa le mafuaaga ole faia ele tamā ole faaoo manu’a ae oloo iai le talitonuga ose mataupu ile va ole ulugalii na mafua ai.
Ose tala faanoanoa tele mo le fanau ale ulugalii le maliu ole tina ile vaiaso tonu oloo tapena le atunuu aemaise o aiga uma i Samoa ile faamanatuina ole Aso Sa o Tina. “Ose faanoanoaga lena ile pitolaau a leoleo ona ole vaitau e fai mea fiafia uma ai ulugalii ma fanau i faatauga mo le aso e faasino i Tina ae tulai mai ai lenei faalavelave”.
Ose isi o mataupu oloo suesueina e leoleo ole maliu ose alii talavou sa faia se inuga pia ma nisi lava o ana uo, ae malama ane le taeao ole aso na sosoo ai ua uma lona ola. “Ose tasi lena o mataupu tau maliu oloo suesueina nei e leoleo ma e leo iloa tonu ile taimi nei le mafuaaga o lena faalavelave”.
Faaalia ele sooupu ole Matagaluega o Leoleo le susuga Su’a Muliaga Tiumalu ua feololo lava mataupu tau maliu i faalavelave e pei o misa ua lipotia i leoleo talu mai le masina ua mavae o Aperila.
“Ole tele lava o nei faalavelave e mafua mai ile taimi oloo tagofia le ava malosi ma e fautuaina ai lava lo tatou atunuu e taumafa fuafua le ava auā a lē lelei ona pulea le amio ma le loto ole tagata ile taimi e tagofia ai le ava malosi ole mea lava e oo iai o soifua e afaina ma ma‘umau”.
Ole Aso Faraile ole aso maliu ia Aperila ua mavae atu sa maliu ai foi se alii talavou i Falelauniu ma ua molia ai foi nisi taulelea ile faia ose faaoogalima i lē ua fano le soifua.
O i latou ua molia ma lē ua maliu na lotolotoi ise inuga pia lea na tupu ai se feseeseaiga. Ole solitulafono pito mamafa lona faasalaga ole faaoo ole maliu ua molia ai i laua ua tuua’ia.
