“Ou te faafetai i le finagalo o matai ua tausia le filemu”
E tatau ona maua mai se faamatalaga mai leoleo i le vaiaso nei i le taunuuga o le taotoga faapitoa e sailia ai le mafuaaga o le maliu o se matai o le aiga i le afioaga o Faleatiu ua maliu.
E mafua lea ona o le faalavelave na feteenai ai leoleo ma nisi o le aiga lea sa faaaogā ai laau malosi, a o agai atu leoleo e faia se sailiga i le fanua o lea aiga ona o masaloga i le totoina ma le umia o laau faasāina o le maruana.
O le Aso Toonai ua tuanai atu nei na taunuu ai i Apia le alii fomai faapitoa e faia taotoga e sailia ai mafuaaga o se maliu, mo le faia o le taotoga o le matai Faleatiu ua maliu.
O se isi lea fomai mai Niu Sila ua toe auina e faia le galuega ina ua le mafai e le isi fomai faapitoa le pathologist mai Niu Sila lava ona faia le taotoga e faapea, e leai sona tomai i manu‘a e mafua i ni pulufana. O le Aso Sa na tea nei na toe foi ai le fomai mai Niu Sila ina ua uma le taotoga.
O le mafuaaga o le feteenaiga i le va o leoleo ma nisi o le aiga lea na papa ai fana ma feoai pulu o laau malosi ma manunua ai leoleo e toatolu ae maliu le tagata o le aiga, ua faaalia e le Komesina le afioga Lilomaiava Fou Taioalo, na mafua ona tali leoleo ona na muamua osofai ane uafana a tagata o le aiga e lē o iloa.
O se faamatalaga o loo lagolagoina e le alii Palemia susuga Tuilaepa L Sailele Malielegaoi, ina ua faaali sona finagalo i le polokalame a le leitio o le 2AP i le Aso Tofi 10 Me 2012. Saunoa le Palemia o le faaaliga atu foi lea a le komesina ma faamalamalama atu gaioiga e faia i le taimi e alu ai se osofaiga (raid).
E le mafai ona faatino se isi lava gaioiga seia vagana ua taunuu leoleo ise aula faalilolilo ma faailoa ile aiga le pepa faataga mai le faamasinoga (search warrant) mo le su’eina o lo latou fale ma le fanua. Faaalia foi e le Palemia, pe ana le osofai muamua ane tagata o le aiga i uafana, e le tali atu leoleo mo le tulaga o le saogalemu.
O taumafaiga a le Komesina e teuteu le feteenaiga i se auala filemu na maua ai le feiloaiga ma matai e silia i le toasefulu o le aiga, ma taunuu ai i se maliega o matai o le a tausi le filemu ae talia suesuega a leoleo. O le suesuega o le a agai tonu i le mafuaaga na aafia ai le matai o le aiga i pulufana ma maliu ai.
O loo iai manatu e faapea atonu o ni pulu fana mai se tasi lava o le aiga na toe aafia ai le ua maliu, peitai o loo malosi le finau mai a le aiga o uafana a leoleo na muamua faapapa atu ma aafia ai nisi o a latou meatotino ma maliu ai le matai.
E faato‘ā faatino le suesuega e pei ona faaalia e le sooupu ma le Komesina lagolago, Leaupepe Fatu Pula, pe a mae‘a ona falelauasi le ua maliu. O le suesuega i laau faasāina na faaalia e Leaupepe o le a faataatia ona o le ma‘ale‘ale o le mea na tulai mai i le Aso Gafua 7 o Me 2012.
Mumu faaafi solitulafono o laau faasāina
O le faamalosia o le tulafono ma puipuia le soifua saogalemu o tagata ma meatotino a le atunuu ma le Malo o le tiute tauave lea o le auaunaga ma le tautua a malu o le malo poo leoleo, o i latou ua ofo lo latou soifua e ala i le latou tautoga mo le faia o lea galuega taua.
O solitulafono eseese ma le tiute o leoleo e taofia ma tafiese ma molia foi i latou e faia o se auaunaga e le tau fesiligia lona tāua i se atunuu e faavae i ni pulega lelei, manino ma malamalama.
O le silasila a le Komesina ma le matagaluega i le faatupulaia o le totoina ma le umia o laau faasāina o le maruana ua saoasaoa.
E fua i le tele o solitulafono e fesootai ma le laau faasāina o loo suesueina i aso uma ma molia ai tagata. “Masalo o le tasi lea o solitulafono ua ave pea i ai le faamamafa i galuega a leoleo ona o le taumafai e taifiesea”.
O se finagalo lea o le Komesina o leoleo le afioga Lilomaiava Fou Taioalo ina ua feiloai ma tusitala i le tuanai o le osofaiga poo le raid na faatutu i se aiga i Faleatiu i le taeaopo o le Aso Gafua, 7 o Me 2012, ae e lei mafai ona faatino ona ua osofaia leoleo e pulufana mai nisi o le aiga.
“O la‘u faatonuga na toe foi mai ai leoleo ua le faia le galuega ona o le fia puipuia i le saogalemu o alii leoleo”. Na faaalia e le Komesina e le foi leoleo i le faia pea o suesuega agai i lea aiga o loo iai molimau o loo faafailele ai le laau faasāina o le maruana.
O le saoasaoa o le solitulafono o loo molimauina foi i nisi o loo maua e leoleo o loo faatauina sikaleti ma taga pepa laiti ua utu i le maruana ua mamago i nofoaga faitele, aemaise le maketi i Fugalei lea sa osofaia foi i se gaioiga a leoleo i le masina o Mati ma Aperila o le tausaga nei.
O aupega o laau malosi o loo iai le talitonuga maumaututu o loo faaaogā e i latou o loo totoina le laau faasāina, e leoleo ai le saogalemu o a latou taumafaiga. Ua lē o toe pogisa le atunuu i lea tulaga ona e iai osofaiga a leoleo ua faia e le gata ina maua laau faasāina ae maua ai ma laau malosi.
O nisi o aupega e le faatagaina ona aumai i le atunuu ae o nisi aupega e lei laiseneina.
O le feteenaiga na tulai mai i le osofaiga a leoleo i Faleatiu na faaalia e le Komesina o leoleo na osofaia ai le taavale na muamua i pulufana, ma o le talitonuga, o nisi o le aiga sa faatutu i ai le galuega, na latou muamua tafana le taavale a leoleo, le mafuaaga o le tali atu o leoleo sa umia aupega mo le puipuia o le sogalemu, lea na aafia ai se soifua o se tasi o lea aiga, ma faaleagaina ai nisi o meatotino a le aiga e pei o se taavale, o se tanevai o le malumalu Ekalesia Aso Fitu faapea ma nisi pulufana na aafia ai vaega o le fale o lea aiga.
O loo finau mai le aiga o leoleo na muamua faapa a latou aupega ma faateia ai i latou o loo tofafa i le taeaopo. E lē o solomuli le Komesina i le teena o lea mau ona o le saunoaga a le afioga Lilomaiava Fou Taioalo, o le faiga masani o osofaiga, e muamua taunuu leoleo i le nofoaga ma le fale o loo agai i ai, ona faailoa lea i tagata o le tusi faataga ua aumai e le faamasinoga poo le Search Warrant e faatino ai le galuega.
Peitai e lei faia lea tulaga ae osofaia le taavale na taimuaina le galuega lea na manunu‘a ai alii leoleo e toatolu.
E tuuina atu lenei lipoti mo le faasalalauiona e lei molia se tasi pe maua foi se feiloaiga a le matagaluega o leoleo ma matai o le afioaga o loo tulai mai lea mataupu.
E iai molimau ua oo i leoleo i le iai o laau faasāina i le fanua o le aiga na agai i ai le osofaiga, peitai o le a faigata ona maua ni molimau mautinoa o ia faamatalaga ma molimau ona ua le faatinoina le galuega sa fuafua ona o le faalavelave na tulai mai.
E lua aso talu ona mae‘a tupu lea faalavelave ae aumai le faaiuga a le Faamasinoga Maualuga ua faasala ai se tina 39 tausaga le matua o Fasitootai i le nofosala i le falepuipui mo le 5 tausaga ma le ono masina.
O lea tina na maua o ia momoli i Savaii se atopa‘u e tumu i maruana mamago. E tolu tagapepa ulu lapopoa ua utu i le laau faasāina na maua i ai i le atopa‘u. O se tasi lea pine faamau e pei ona faaalia e leoleo o le faatupulaia ma le saoasaoa o lenei solitulafono, ma o le galuega e tatau ona fai o le tafiesea ma molia i latou o loo faia.
Tea le leoleo satini sinia, taofia le isi toalua faasolosolo manuia
Ua faasolosolo manuia alii leoleo e toalua e aofia ai le malu o le malo na tigaina i se pulufana i lona fatafata, ae ua tea i tua le leoleo satini sinia na aafia lona vae ma lona ogalima i le pulufana.
Ua faailoa e le Komesina lagolago le afioga Leaupepe Fatu Pula, suafa o alii leoleo na aafia i pulufana a o agai atu se vaega o alii leoleo e sailia le fale ma le fanua o le aiga lea i Faleatiu o loo masalomia i le totoina ma le umia o laau faasāina o le maruana.
O leoleo na manunu‘a i le faalavelave o le alii leoleo satini sinia le afioga Lemalu Upumoni, a o alii leoleo poo Constables e toalua na aafia o Toso Talatonu ma Solomona Tuugalilo, o i laua uma e galulue i le pou a leoleo o loo i le afioaga o Afega.
