“Ia outou fatu ni pese malie ma lagi se vii lelei, e faailoa ai le Silisili ese o le Atua ma ia outou tautau lona mamalu i nuu ese”.
O se vaega lea o upu tomua o loo faalauiloa ai le taumafaiga a le Autalavou a le Ekalesia Metotisi Samoa i Panmure lea ua amata faatauina nei le latou cd ma le dvd o pesepesega ma siva faitaga.
O le faamoemoe maualuga o alo ma fanau a le Matagaluega ina ia faaaoga lo latou ola ma ofoina le malosi e fatu ai pese ma viiga ao se vii foi e viia ai ma faafetaia le Atua silisili ese.
O le galuega sa feagai ma le Autalavou sa o faatasi ma le lagolago mai le kamupani a le Supervalue Supermarket i Dawson faapea foi ma le lagolagosua mai le Pulega a Aukilani.
O fatuga ma pesepesega o loo aofia ai sa tuufaatasia lava e nisi o tamafanau a le Ekalesia faapea pese mai le tusi pese a le ekalesia. Sa pueina pese i le Ola i Vavega Studios faapea foi ma le MOLYG Production.
O le Autalavou lea a le Methods of Life poo Metotia ole Ola taitaia e le susuga i le faafeagaiga o Ierome Pio ma le faletua o Maraea.
O se amataga lelei i le amataga foi o lenei tausaga fou ma ua momoli ai le faafetai ma le faamalo a le Autalavou i matua faaleagaga aemaise o le tapuaiga i tama ma tina matutua o le ekalesia, aiga ma uo ma i latou uma sa lagolagosua i le faamoemoe mai lava i lona faatoa amataina.
Ua mafai nei ona faatauina le lipine ma le dvd i Aukilani ma e pei ona molimau le faafeagaiga e le o se galuega na faigofie lona faatinoina peitai ua tau i manu le faamoemoe, o le viiga maualuga lea o le Atua.
