O le aso mulimuli o taualumaga o le Palemene i lona paea‘iga lona 14, na toe laga ai e se tasi ua loa lana tautua faafaipule, se tasi o mataupu na muai fofogaina ai finauga i le Palemene.
O le afioga A‘eau Peniamina, o le sui faipule o Falealupo na ia laga le popolega i le toatele o tagatānuu o Saina ua vaaia i Samoa.
O le toatele na ia ta‘ua o tagata faipisinisi ma o le omai i Samoa ma le tele o le tupe, ua faigofie ai ona faatutu a latou atina‘e eseese i nofoaga o loo taufao ai le toatele o Samoa ina ia maua auā o nofoaga e tumutumu i ai le atunuu i le talafatai o le taulaga.
Na ta‘ua e le alii faipule le faigata tele i tagatānuu o Samoa ona tauva i faipisinisi nei.
O le laga o lea mataupu na tali mai ai le alii Palemia ma ia tuuaia ai le alii faipule o Falealupo i le faailogatagata. Sa faapea mai le Alii Palemia, o lona uiga o faamatalaga ma lafoga a le sui, o ia o se tagata e lē o talia foi aiga Saina ua leva ona i Samoa e pei o Ah Liki, Ah Mau ma le anoano o isi.
O le tali a le alii faipule, o le tele o aiga nei o ana uo mamae ma o tagata Samoa ua iai piitaga i Saina e lē o ta‘uesea o ni tagatānuu o Saina ae o tagatānuu o Samoa.
“E oo foi ia i latou nei o aiga Samoa e tupuga mai i tagatānuu o Saina, o loo matuā popole lava i le numera o tagatānuu o Saina ia ua vaaia i Samoa”.
O le alii pule o le Kamupani a Amau i Samoa o Komisi, na ia laga muamua foi atugaluga i le auala o loo faafaigofie ai le omai o tagatānuu o Saina ma faatutu a latou pisinisi i Samoa.
E pei o le finagalo o A‘eau na ta‘ua e Komisi Amau, o loo tele auala ua faafaigofie ai le oo mai o nei tagata i le atunuu ma ua tuuavanoa i ai le Malo i le tele o aiaiga ina ia faafaigofie ona malaga mai ma faatutu a latou atina‘e i le atunuu.
O le popolega o lenei alii faipisinisi ona o le tuuitiitia ai o avanoa mo tagata Samoa lava ia faipisinisi e atia‘e ai ona o le maualuga o le faiga faatauvaga ua iai nei ma iu ai lava ina lē mafai e tagata Samoa ona tauva ma faipisinisi mai i fafo.
O se tasi lenei o auala o loo vaavaai pea le Malo e pei ona faamanino i le tele o mataupu na lagā i atina‘e mai i fafo, o le taumafai lea e tele ni pisinisi mai fafo e faatutu a latou taumafaiga i Samoa.
O se auala ua saili ai foi le seleni maua a lo tatou atunuu.
Ae o le isi atugaluga la lea ua faatu mai o le ono suia ai o tu ma aganuu a Samoa talu ai le laititi tele ma e faigofie ona suia uiga o ona tagata pe afai e toatele i latou mai i fafo e aumaia tu ma aga mai i fafo.
O lenei mataupu e lē gata i tagatānuu o Saina ae ua faapea foi tagatānuu Bangladesh, tagatanuu o Fiti ma isi lava atunuu ua vaaia le toatele i Samoa, ua tele foi finauga ua molimauina ai mai i tagata lautele lava o Samoa.
O popolega lava nei ua laga ae o le finauga lava lea a le Malo, e tatala le avanoa mo i latou e mafai ona aumai pisinisi mai i fafo, e aogā i le atina‘ega o le tamaoaiga o Samoa.
