Iu manuia polokalame mo Autalavou a le Truelight Christian Church

Na faatumulia le malumalu tapuai o le Ekalesia a le Truelight Christian Church i le pitonuu o Niddrie i le afiafi o le Aso Sa na mavae atu, i autalavou ma le mamalu eseese na valaaulia mo le polokalame faaolaola (youth rally) a la latou Autalavou.
Na aofia ai le autalavou a uso mai Tonga ma Fiti, faapea ma autalavou a isi Ekalesia Samoa, aemaise o nisi o autalavou mai Kenya i Aferika.
O le failauga o le faamoemoe o le susuga ia Dr Tee na malaga faapitoa mai le atunuu o Meleisia, o ia foi o se pule aoao o se kolisi faafaifeau i lea atunuu.
Sa tofu sao autalavou uma na tauaofia i faafiafiaga ma siva faale agaga, na fai ai foi ma se sao o le susuga ia Levae Levae se tasi o tamalii iloga i le musika, o se tasi o itu mataina i lea afiafi, o le tutu faatasi o alo ma fanau talavou mai atunuu eseese ma sii faatasi le viiga o le Tapaau sili, auā e ui ina eseese lanu ma gagana, eseese foi le faatinoina o faiga tapuaiga, ae tasi lava le Atua o loo tapuai i ai.
Na mae‘a siva ma tala faaleagaga, ona alo lea i le taumafataga ma faamasani ai tupulaga talavou, aemaise o faafeagaiga eseese, ma ta‘ape ai ma le fiafia.