Ole lakapi ua matuā iloga ai ona lauiloa tamafanau a Samoa na soifua a‘e i Niu Sila ona ua filifilia ile Olopeleki.
Ua fia ma fia tamafanau a Samoa ua ta’uta’ua ai Niu Sila e pei o Jerome Kaino ma Steven Luatua.
O nei alo o Samoa oni tama iloga foi ole ‘au a Aukilani Lanumoana, ma o lo la filifilia e malaga i Samoa e faalauiloa le taaloga muamua ole Supa Lakapi ole a faia ile Apia Park ile aso 2 ole masina fou o Iuni ose avanoa faaauro mo le toatele o tupulaga ma le atunuu e feiloai atu iai ma saini o la suafa i pepa faalauiloa ole taaloga poo posters faapea fu‘a poo tagavai ole Auckland Blues faapea ma ata pue ole ‘au a Aukilani.
Ole Bluesky ose tasi o kamupani lagolago malosi ile faia ole taaloga ale Blues ma le Reds i Samoa ma na molimauina le lolofi atu ole atunuu ma tupulaga ile ofisa autu ole kamupani e fia feiloai ia Kaino ma Luatua.
Ina ua maua le avanoa ole tusitala e faatalanoa ai le susuga Kaino ina ua maua le faatagana mai le sui ole pulega ole ‘au a Aukilani, sa matua iloa mamao atu lava le naunau o si alii e fia talanoa ise tagata faasalalau se‘i aumai i fafo ona lagona fiafia ma le mimita ona ua aumai i lona atunuu o Samoa se isi taaloga ole taamilosaga ole Supa Lakapi.
Fai mai Kaino ua mea tutu‘a le tapenaga a Samoa ma o lana lava molimau moni ua matua saunia ma tapena Samoa e talimalo ini taaloga tetele faapea aemaise ia maua ni taaloga se tele ole Supa Lakapi e aumai i Samoa.
Ole taaloga ale Manu Samoa ma le Olopeleki ia Iulai ole tausaga e 2015 na faia mai i Samoa na ta‘ua e Kaino ole amataga lea o lona lagona fiafia tele ona ose avanoa o taaloga tetele faapea e silasila ai Samoa i ana tamafanau o alo o Samoa oloo taaalo i ‘au e pei ole Olopeleki ma aulakapi a Niu Sila e pei ole Blues.
Oloo iai le naunautaiga o Kaino ole taaloga ile masina fou o Iuni ole a toatele le atunuu e tapuaia le ‘au a Aukilani aua toetoe lava o tama uma ole ‘au e iai o latou toto o tagatanuu Samoa.
Ole molimau ale pule ole kamupani ole Pacific Ezy Money Transfer ose tasi o lagolagi ile taaloga ma na faaalia ele pule ole kamupani lafo tupe faamomoli i Samoa le afioga Magele Frank Ah Kau, ole mafuaaga lea ole lagolago ale kamupani ile taaloga aua ose avanoa e piiama ai le kamupani le faamoemoe ole Malo e aumaia taaloga faapea i Samoa mo le faatosina mai ai o tulisi e malaga mai i Samoa.
Ua ta‘ua ese molimau e amata ona tutumu faletalimalo ile atunuu ile vaiaso nei a‘o lei oo ile amataga ole masina fou o Iuni ole a faia ai le taaloga ale Blues ma le Reds.
Ose tasi lea o vaega tāua ole faamanatuina ole 55 tausaga ole Tutoatasi ile masina fou.
