(Manatu faatupu manatu e tuufesili ai poo fetaui ma afioga a le Atua la tatou galuega faatino)
O le matua tauave lea a le YFC poo le Autalavou mo Keriso. O lona uiga, e lē suia e se tagata le ute o le Talalelei, o Iesu o le Papa, ae ia momoli le feau e faatatau i suiga e talafeagai ma taimi fesuisuiai. I se isi faaupuga, O le fuata ma lona lou.
A o feafioai Iesu i le fogaeleele, sa feiloai i le anoanoa‘i o tagata. Sa a‘oa‘o ma faafetaiai o latou manaoga. E leai se tagata soifua e faatusatusa i ai le ofoofogia o ana aoaoga, ae seasea na fai faalua e Iesu se mea e faataunuu ai lona finagalo. E tele ana auala ma ana metotia, ae auga uma i le faaali atu o
lona alofa.
A tautala ma le aufaresaio ma ē popoto, e faaaogā e Iesu upu maotua e faamalamalama ai lona finagalo, faapei o Nikotemo sa faaaogā ai upu ‘Fanaufouina.’ Ae ina ua feiloai ma le fafine i luga o le vaieli, sa faaaogā le galala i le fiainu e faapupula ai le malo o le Atua. A lauga i le motu o tagata, e faaaogā faataoto ae a tautala i ona soo e faaaogā le gagana tuusa‘o. Ina ua finau le ausoo poo ai e sili, ae aapa Iesu sii le tamaitiiti ma faamanuia i ai.
E tele isi faataitaiga, pei o le tauaso sa feanu Iesu i le palapala ae nini ai mata ma toe pupula. Ae ina ua sau le taitaiau mo le faamalologa o lona afafine, sa faatino i lana fetalaiga ma lana upu. E a‘oa‘o mai ia tatou, e lē tasi se auala poo se metotia tatou te faaaogāina e tala‘i ai le finagalo o le Atua.
E lē tatau foi ona finau, o le mea lava na sau ai, o lena lava. Ua sui taimi, tupu tele le malamalama, ma saoasaoa le taaviliga o le lalolagi. E tatau ai ona mata‘itū le matua tauave a le YFC. Afai e leai, e fano le toatele ma maua e le tiapolo tupulaga talavou o a tatou faigalotu.
E ui lava e na o le tolu tausaga o le misiona a Iesu, ae sa matuā luluina le lalolagi, e oo mai i le taimi nei o loo aave tala o lona soifua.
Atonu e te faapea mai, ua tatau auā o Iesu o le Atua. E sa‘o, ae o le faaaoaoga mo tatou e pei o lana fetalaiga, afai tatou te faatuatua ia te ia, e sili mea tatou te fai. Afai sa faia e Iesu, ua ia aumai foi le avanoa tatou te mafai ai. Ae tatou vaavaai i le soifua o Iesu, poo ai ni lesona aogā mo tatou.
(i) O faaaoaoga lelei
Atonu tatou te lē faia vavega sa fai e Iesu, fai ona aoga ma manuia nisi e latalata ia te oe pe a faaaoga tatau lou soifua. Sa maofa tagata i ona uiga ma lona tausaafia. Vagana taimi e fetaui ai ma faresaio ma tusiupu, e matuā saunoa Iesu ma le pule. Afai e faautauta, e aoaoina e lau fanau ma lou toalua nei uiga lelei. Afai e te faamaoni, e aafia ai ma lau fanau ma ē latalata ia te oe, e faamaoni. Ae afai e te amio faasausili, e aliali mai i soifuaga o ē latalata ia te oe, pe iu foi ina tetee mai ma faasagatau lau fanau poo le Ekalesia ia te oe. O le lē talitonuina lea o au faaaoaoga.
(ii) O lana aoaoga
Ua tatou iai i se lalolagi ua tumu i le poto o tagata. E fai foi o au aoaoga, ae ese foi aoaoga e aoaoina i aoga ma uo, e faafēluafesasi ai. A o Iesu, sa aoao le finagalo o lona Tamā. O le tatou matafaioi lea, ia aoao afioga a le Atua i lotu ma aiga. Ua taunuu nei fetalaiga a le Tusi Paia, ua feū taliga o tagata e faalogologo, ua lē toe talia faatonuga mai afioga a le Atua. Ua fai lava le mea e manatu i ai le tagata, ae faapea, ua fetalai mai ai le Atua. Ae faapefea na iloa le moni ma le sese? E iloa i fua o olaga ma amioga faaalia e tagata.
(iii) O lona alofa
O le isi mea matagofie ia Iesu, e lē faailoga tagata. E tutusa ia Iesu le tagata matua ma le tamaitiiti, le mau‘oa ma le mativa. E pai atu i ē malolosi, toe aapa ane i lepela. E faauō i ē taualoa, toe mafuta i tagata agasala. O tatou, ua faailoga tagata tatou te fiafia i ai. Tatou te faauo i tagata e maua ai a tatou mea, poo tagata e faaseeina tatou i upu faa‘ole‘ole ae ufiufi ai mea sese. Tatou te faauo i tagata a avatu sau mea, e toe maua mai ai sau mea. O Iesu, e lē faapena.
(iv) Sa ia faataitai i ona soo lona ola
E ui i le toatele sa mulimuli ia Iesu, ae sa sasaa lona silafia i ona soo. O latou ia sa fai ma ana fesoasoani. Sa latou aai ma feoai, ma matamata i vavega ma tiga uma sa ui ai Iesu. Ina ua maliu ma siitia i le lagi, o ana uo nei sa faasalalauina lana misiona. O ana molimau faatuatuaina ia sa faaauau le galuega. Sa talitonuina e latou nei aoaoga sa faalogologo
i ai.
O le mea lea e iloa ai le manuia o a tatou aoaoga, pe afai e amia tatou e le maliu ma le oti, ae faaauau e fanau ma uo lau misiona. Ae afai foi e malaga ese ma tatou, latou te faaauauina tatou aoaoga, e iloa ai sa faalogo ma malamalama. A leai, o lona uiga e lei lelei na fai faataitaiga, e lē lelei le faaa‘oa‘o.
Ia alofa mai le Atua ia tatou, ina ia uma lo tatou ola, ae faaauau ona savavali a tatou fanau ma aiga i aoaoga ma faataitaiga e tusa ma afioga a le Atua. Soifua.
