Ole faapaaga fou lea ua osi nei ale faletupe ole BSP, Bank South Pacific ma le Toomaga, ua alia’e mai ai ma le faapipii atu ale pulega ole BSP, e ‘apo mai tina Nofotane o Samoa ua amata ona faatau a latou oloa ma maua tupe.
Na talanoa ai le tamaitai ole pulega ole BSP, ua uma ona latou faia le poloka ile maketi i Fugalei, e faatau ai oloa a tina Nofotane ole atunuu.
Ole faamoemoe ina ia mafai ai foi ona o latou fesoasoani atu, ile a’oa’oina lea ole aufaipisinisi i auala e faia ai teuga tupe, ma sefe ai a latou seleni mo aso timu.
“Tusa poo le ā le ituaiga o tupe e maua, ae ole itu tāua, ole faamasani e fai teuga tupe, ma ia maua ai se mea aogā, nai lo le maua lava ole tupe o lea aso, ma faaaogā e faia ai faatau.
Na talanoa foi le Peresetene, Siliniu Lina Chang, ua tele lava se fesoasoani ale BSP, e faafetaia ai lava ile latou foi tautua.
E le gata ina latou faafouina falekuka o tamaiti ile lotoā i Tuanaimato, ae ole saga faamatagofieina lea. E aofia ai ma le toe fufuluina atoa o nofoa ma le fale’ai, ua toe vali samasama ma le uliuli, pou ole fale‘ai o tamaiti. O tapenaga uma nei, ua avea foi ma mealofa a lenei faletupe i fanau sauaina a Samoa mo le aso ole Kirisimasi. O talaave ole maketi o oloa a tina Nofotane a Malo Aufaatasi ma le Toomaga mo ē Puapuagatia, ua oo atu nei i luga o maketi faavaomalo, e tauala atu i auala televavave.
Pei ona molimauina i ‘ula lopa, ma ato laufala, o koko Samoa, o siamu popo, ie elei ma le anoanoai o oloa ua gaosia nei e Nofotane ole atunuu.
Ua mafai ona faatau, e le gata ole ofisa ole Toomaga i Apia, ae o luga o Face Book, ma le avanoa faapitoa ua totogiina nei ele BSP, ile maketi i Fugalei.
Na talanoa foi Siliniu, ile amata ai ona tau faamalieina o oka mo meaalofa ole Kirisimasi mai kamupani ile atunuu, aemaise lava ile siamu popo ma le koko Samoa lea ua oo foi i lona taimi e taulia ai tele mo meaalofa.
Ole manaoga ole Toomaga ia oo atu ile 500 nisi pisinisi fou a tina Nofotane o Samoa, ile taimi e uma ane ai lenei polokalame oloo faagasolo nei, i lona tausaga lona lua. O faamanuiaga uma lava nei, ua aofia ai ma le faia lea ose tusitupe ile faletupe ole BSP ise faapaaga faapitoa ma Nofotane o Samoa.
Ua molimauina ai e le gata ina tuu mai le tau’au ole faletupe e ofo ane avanoa mo le aufaipisinisi tau atinae a Nofotane, ae ole taumafai ai foi e faaatoatoa le saogalemu ma le mamā soifua maloloina ole nofoaga e gasese ai taumafa a fanau sauaina.
Pei ona faaopoopoina ai nei le isi pepe fou ile faaiuga ole vaiaso, ma toe siitia ai foi le aofai o tamaiti ile fale faapitoa mo pepe, o tuaoi i Sasae ma le ofisa o leoleo. Ole isi fale o sosoo ane ai, oloo tausia lea ele kamupani telefoni ale Digicel, faapitoa mo tamaitai ma’itaga, ua faaigoa ile Ray of Hope.
Sosoo ane ai i Sisifo ma le fale mo teine talavou, 13 i luga, le House of Hope, ma le fale ile pito i luma ile aualatele mo tamaiti laiti, mai le 3-12 tausaga. E ese mai le faleaoga, ma le fale‘ai. O nei atufālega uma ile lotoā i Tuanaimato, na fausia uma lava i meaalofa mai le alofa tunoa ole tele o Samaria Agalelei, e pei ona galulue ai nei foi le BSP ile faaiuga ole vaiaso.
