Na toesea le Autalavou a le PIPC i Porirua mo se faigamalologa i Rarotonga i le Atu Kuki Ailani, ma o le Aso Gafua, 21 o Iulai na faataunuu ai lena malaga. O se malaga manaia ona o le vaai atu i le talimalo ma le laufofoga fiafia o tagata na mafuta atu i ai.
Sa lei iai se faamoemoe o le a feiloai ma se toatele o ni tagata Samoa i lea atumotu, peitai na faateia le aumalaga ina ua taunuu atu i le malaevaalele o laina mai nai tagata ma ula ma pale Rarotonga e faapale ma faaula ai le aumalaga.
O le ekalesia Cook Island Christian Church (CICC) i Nikao, Rarotonga na faamautu i ai le tafaoga i o latou maota matagofie na api ai ma sa vaaia lava itu uma e le susuga ia Pae Tuteru, o se tiakono na galue i le PIPC i Porirua mo ni tausaga se tele ma lona faletua ia Kafo Tuteru ma si o la aiga.
Na asiasi mai le Mafutaga a tagata Samoa i le po o le Aso Lulu, ao le Mafutaga a nai tagata Toelau na taunuu mai i le po na sosoo ai.
E faapea le tala, o le tele o tama taaalo a Samoa na malaga i Rarotonga mo taaloga lakapi ma faapea lava ona masani ma faaipoipo atu ai i tamaitai Rarotonga. O le tasi lena o mafuaaga ua iai ni tagata Samoa i lea motu.
Sa faatasi atu le aumalaga i le faamanatuina o le 163 tausaga talu ona taunuu le Talalelei i Rarotonga. O iina foi na iloa ai e le toatele o le aumalaga na muamua taunuu Ioane Viliamu i Rarotonga. Faapea lava o Samoa ae leai o le 1821 na taunuu ai le lotu i Rarotonga ae faatoa taunuu i Samoa i le 1830.
O se maimoaga matagofie na faia i le Te Varanui o se tasi o fale matagofie faafiafia mo turisi. O lenei pisinisi tele o se alo (great grand daughter) o le Susuga ia Malietoa Laupepa e ona, ma na maua le avanoa e feiloai atu iai i lea tina ua 75 ona tausaga ae o loo malosi pea i le faagaioiga o le pisinisi.
Na saunoa Vara: O le tina o lona tina o Mele Laupepa Malietoa, ma o lona tina o le Rarotonga ae e lei lava se taimi e mafuta atu ai i lona aiga Samoa. O le tele lava o lona olaga o Rarotonga. O lana tama teine e nofo i le palagi lea ua faatautaia le pisinisi ma o se nofoaga matuā matagofie lona teuteuina, e faatusa lava i La‘ie i Hawaii le faatinoga o maimoaga i faaaliga o siva (show) eseese.
Na oo atu le maimoaga i talafatai i matafaga (beaches) matagofie o Rarotonga ma sa fiafia le aumalaga e taeele ma fai tuitui ai ma loli; na vaaia le paepae solo i le sami manino. Na pei lava ua toe fagogota i le sami o Samoa ina ua vaaia figota masani e pei o loli, sea, tuitui ma maisu.
O le isi maimoaga o uila (scooters) i le tele o le taulaga e vaaia ai le toatele o tagata e feoai i scooter aemaise o tina ma le autalavou. E sau le isi scooter e na o le tina e sulu ‘ao‘ao (tulou) mai le ie ma ua suia ai lava le maimoaga a le aumalaga e lē masani ai i ia uiga i nofoaga faitele.
Tele faletalimalo e faasolosolo i le talafatai (coast) ma e leitioa toatele turisi e faimalaga i lea atumotu o le Pasefika. Ua toatele foi tamafanau o Samoa mai Niu Sila ua avea Rarotonga ma nofoaga e fai ai a latou faaipoipoga. O le tau o oloa e matua taugata tele aemaise lava o le penina (pearl).
E taugofie ai lava Niu Sila faapea ma Samoa. Ae afai e te fia malolo mai le tele o galuega, malaga loa i Rarotonga e maua ai le filemu o le mafaufau ma fiafia ai le loto e tafao.
