“E sese na lipoti ou te lei faatagaina le aveese o ni faila”…Papalii John Taimalelagi Afele.
O Oketopa o le tausaga ua mavae 2016 na momoli ai e le avetaavale a le ofisa o Faamasinoga i Mulinuu ni faila o le suafa Ainu’u i le ofisa o le Minisita o Faamasinoga le susuga Faaolesa Katopau Ainu’u.
O le faamatalaga lea a le avetaavale le susuga Tuulima Io. O le faatonuga a le Ofisa Sili o le Matagaluega o Faamasinoga le susuga Papalii John Taimalelagi Afele, na faia ai e le avetaavale lea galuega.
Peitai ina ua tuusa’o le fesili i le Ofisa Sili o lana tali lenei: “Ou te matuā teena lena tulaga ma e sese na lipoti. Ou te lei faia foi se gaioiga ou te aafia ai i se solitulafono”.
O le lipoti na faasalalau e le nusipepa o le Observer i le Aso Faraile ua mavae na masua uma ai i fafo se finagalo o le avetaavale, i le tuanai o le lua aso talu ona fesiligia e le tusitala o lenei lipoti le Ofisa Sili pe moni sa ia faia se faaiuga e aveesea ni faila o mataupu a le faamasinoga o fanua ma suafa ma tuuina i le Minisita o Faamasinoga. “Mo lou silafia lau tofa, e iai le faiga masani a le tatou ofisa e faatumu ai le form ona ave lea e silasila iai le lesitala ma le ofisa pe talafeagai ona silasila nisi i faila o a latou mataupu, ae e lē mafai ona ave i tua ni faila”. O le toe faaopoopo mai lea o le susuga Papalii i le talanoaga i luga o le telefoni.
Na faaalia e le susuga Tuulima na ia mae’a ona ia momoli faila i le ofisa o le Minisita ona ia mafaufau lea i le gaioiga e lē o se tulaga talafeagai.
O le masina na tea nei na faato’a faailoa ai e le avetaavale le mataupu lenei i lana faamatalaga na ia ta’u i le Faamasino Sili le afioga Patu Tiavaasu’e Falefatu Sapolu ina ia silafia ai ia faiga. O se molimau faatuatuaina mai le ofisa o faamasinoga na ia faailoa mai i le tusitala le mataupu lenei ma faapea ona faia ai suesuega ma fesiligia ai loa le Ofisa Sili.
O loo teena foi e le Minisita o Faamasinoga lona faatonuina o le Ofisa Sili e avatu ni faila o mataupu a lona aiga.
E lei manuia sailiga mo se finagalo o le Minisita ae o le a tuliloaina pea.
O le tala a le avetaavale o le ono tausaga o galue i le Matagaluega o Faamasinoga o lona faato’a iloa lea o se gaioiga faapea ua tupu. E manino i le finagalo o Tuulima o isi pulega sa iai muamua e lei tupu lava se mea faapea o le ave i tua o ni faila.
E lei toe maua se finagalo o le Ofisa Sili ina ua faailoa e le avetaavale le mataupu.
