O Samoa le isi atunuu o loo avea ma sui o le faalapotopotoga o faasalalauga tau leitio ma televise mo atunuu Asia ma le Pasefika. Peitai e lē o leitio uma ma televise i le atunuu o loo avea ma sui o lea faalapotopotoga tele ua silia i le limasefulu tausaga talu ona faavae.
Ua na o se televise ma se leitio o loo avea ma sui ma o le mafuaaga lea ua agai ai manatu o nisi o sui o ia itutino o faasalalauga i le atunuu, e faatalatalanoa le faatuina o se faalapotopotoga o itutino tau faasalalauga o leitio ma televise a Samoa ina ia mafai ona galulue faatasi ma fetufaai ai tomai ma iloa i le faatinoga o a latou tautua tau faasalalau.
Faaalia e le tamaitai pule sili o le kamupani faasalalau o le Samoa Broadcasting Limited le afioga Galuemalemana Faiesea Matafeo, e ese le matagofie pe a galulue faatasi uma tagata o loo faafoeina televise ma leitio i le atunuu auā e mafai ai ona talanoaina i se tulaga faasoa faafitauli o feagai ma ia tautua. O le itu sili ona tāua ai auā o le a iloa ai vaega o faaletonu ai ona fesoasoani lea i ai ma fetufaai silafia ma tomai e pei o le itu tau inisinia.
O le Asia Pacific Broadcasting Union poo le Iuni o faasalalauga a atunuu Asia ma le Pasefika o se faalapotopotoga o loo avea ai le Samoa Broadcasting Limited o loo pulea le TV1 i Mulinuu ma sui auai.
Na faaalia e le tamaitai pule o le kamupani e maua mai ai i le faalapotopotoga fesoasoani mo le faaleleia o le tomai o tagata faigaluega aemaise o le itu faainisinia i le vaaia o masini ma satelite. O le avea o ni leitio ma ni televise i Samoa ma sui auai o le a latou maua ai le faitotoa e faatalosagaina ai ni fesoasoani mo i latou.
O le fono lea sa usuia i Nadi i Fiti i le vaiaso ua mavae sa faatalanoa ai foi auala e mafai ona fesoasoani atu ai le faalapotopotoga i ona sui auai. Talu ai nei na maua ai e le TV1 se fesoasoani mai le atunuu o Korea e ala i se meaalofa o mea pueata ma masini mo le faletelevise, ma o se meaalofa o le a fesoasoani i le faletelevise ia latou faasalalauga aemaise o le pueina o taaloga a tupulaga talavou a Malo o le Taupulega o le a faia mai i Samoa i le tausaga fou.
O le fonotaga foi i Fiti na faamaonia ai le talimalo o Samoa i le isi fonotele a le Iuni o faasalalauga tau televise ma leitio a atunuu Asia ma le Pasefika i le masina o Aukuso o le tausaga fou 2015.
