E lei atoa se tausaga talu ona ofi atu le afioaga o Salesatele i Falealili aua le atinaega o le faasao o le faisua. O le pulega a alii ma faipule ma le malosi o le nuu ia o loo faatautaia lea faasao lea ua faaalia e Tauaefa Faresa o le sui o le Ofisa o Faigafaiva ae o se sui foi o Salesatele ua faaopoopo pea le numera o lea figota.
“E sili atu i le 300 le aofai o faisua ua iai nei i le faasao o le afioaga. O loo faapea foi ona ao mai e taulelea le faisua o loo maua mai i le aau aua lava le faaopoopo ai o le numera o faisua e maua i le faasao lenei a le afioaga, ” o se faaaliga lea a Tauaefa.
O loo faagasolo asiasiga a le Ofisa o Faigafaiva i afioaga o loo faasao ai le faisua ona o le manaoga ina ia faaauau ai pea e pulega a afioaga le vaaiga o nei atinae.
“Afai e alualu ae manuia ma ua lava foi le faasoa a le nuu i le faisua e mafai foi ona faatau atu aua se seleni maua a aiga taitasi”.
Taua e Tauaefa e tusa ma le 32 aiga matai o loo i totonu o Salesatele ma o le vaiaso ua tuanai na amata ai loa ma se aoaoga i le tomai tau fai pisinisi i vaega eseese o le afioaga, o tina ma tamaitai, o le saofaiga a matai o le nuu, o le tupulaga talavou ma soo se tasi lava ua mafai ona auai ane e aoaoina ai i lea taumafaiga e pei ona faatautaia e le Faalapotopotoga o Pisinisi Laiti i Samoa le SBEC.
Ua tapa e le afioaga lea fesoasoani ina ia saga unaia ai tagata o Salesatele e faatutu ni a latou lava pisinisi laiti i totonu o le afioaga.
Faaalia e Tauaefa ua mautu elei a tina ma isi a latou galuega taulima, mautu suisuiga a tamaitai aemaise o nisi o atinae tau i faatoaga ua mafai ona maua ai ni atinae e ono amata ai ni pisinisi laiti.
O aoaoga i le faalelei ma le faatautaia o pisinisi ia na talanoaina ma ua maea nei la ae o le a tulimatai le faaauau ai o nei atinae i totonu o Salesatele.
Faaaia e Tauaefa e lei leva ona ofi atu Salesatele i le polokalame lenei o le faasao o le faisua ae o le tasi lea o afioaga e mau tele i le faisua.
Sa iai le faasao tele o le faisua a le Malo sa i lalo o le vaavaaiga a le Vaega o Faigafaiva a le Matagaluega o Faatoaga ma Faigafaiva. Peitai ua tapunia ona o le nofoaga tonu lea ua faaaoga e le Faletalimalo a le Aggie Grey’s Resort i ogasami o Mulifanua. O lea la ua faamatuu atu ai e le Vaega o Faigafaiva le atinaega o faisua a le afioaga latou ma ua vaaia le tele o le aoga o lenei polokalame ua mafai ai ona toe vaaia faisua i gataifale o le atunuu. O le nuu lava la i ona matai o loo leoleoina le faasao lenei ma faaputuputu pea faisua ua aoina mai i le aau aua le saga faaopoopo ai o le numera o faisua ua maua e lenei faasao.
“E ese mai le faasao a Salesatele i faasao o faisua ua vaaia i isi afioaga o le atunuu, ona o Salesatele o le faisua ua mafai ona aoina o faisua lava o loo maua i ogasami o le atunuu e le pei o isi faasao, o faisua mai i fafo,” o se faamatalaga lea a Tauaefa Faresa.
Ua faamalosia i faasalalauga le toe foi o le atunuu i atinae e pei o maumaga ma faigafaiva talu ai taimi faigata ua iai nei ma valoaga ua oo mai le oge i lenei vaitau ona o le faaletonu ai o mea toto ma le gataifale.
O le feau taua foi lea o loo faalogoina pea i Salesatele o le taumafai ina ia mautu atinae e pei o faatoaga aemaise ai foi o faigafaiva e taofia ai le tulai mai o le fia taumafa. Ua faaopoopo ai foi ma le taumafaiga ina ia avea lea faasao ma pisinisi i totonu o le nuu.
O loo faaauau ona faatautaia asiasiga faalemasina a le vaega o Faigafaiva i masina taitasi ona o le manaoga lava ina ia aua nei faamaamulu nisi afioaga mai i nei galuega faasao. Mo le afioaga o Salesatele, ua amata ona faitau aso e mafai ai ona fafai le faisua e le gata mo le taumafa i le tausiga o aiga ma le nuu ae o le faasoa atu foi ina ia mafai ona faatau ae maua ai se seleni a le afioaga mai i lea atinae.
