E tusa ma le tasi le miliona tala le tau atoa o se foai na tauaao i le faaiuga o le vaiaso na te’a nei e se Televise a le Malo o Korea i Saute mo le TV One a Samoa nei ina ia fesoasoani i le tele o galuega faatino ae e utiuti meafaigaluega.
O le filifiliga a lenei Televise tele e ta’ua o le KBS (Korea Broadcasting Station) mo Samoa na mafai ona maua ona o le filifiliga a le Iuni a Ofisa Faasalalau a Asia e aofia ai ma le Pasefika le ABU e ave lenei foai i le TV One o se tasi o sui o lenei Asosi o Ofisa Faasalalau i lenei itu o le lalolagi.
O le filifiliga e iloilo ai televise i totonu o le li’o lenei e ave iai fesoasoani faapea, e fua i galuega faatino aemaise o le manaoga e faalautele peitai e le ‘a’u’a’u le faasoa.
O lea la na maua ai le avanoa e faatalosaga ai le pulega o le TVOne i Samoa, lea e i lalo o le kamupani ua ta’ua o le Samoa Quality Broadcasting Ltd. Ua umia e nisi o tagatanuu o Samoa ma ni faalapotopotoga. O meapu’eata e iva (9).
O masini e pu’e ma faamaumau ai ata, o computers ua patino lava lo latou aoga mo le tuufaatasia o polokalame aemaise o talafou ma faasalalauga faapisinisi, o nisi ia o meafaigaluega ua sau i lalo o lenei foa’i ma na malaga mai ni sui o le KBS i Korea e faatautaia aoaoga mo alii ma tamaitai o le TVOne o le a faaaoga nei masini i le lumana’i.
O le faafetai na momoli e le tamaitai Ofisa Sili o le TVOne, le Afioga Galumalemana Faiesea Lei-Sam Matafeo, o ia fo’i lea na faaulu le talosaga mo nei meafaigaluega ma ia ta’ua ai le taua tele o lenei foai ma o le taimi muamua lenei talu ona faavae lenei televise ua maua ai se fesoasoani maua fua faapenei.
Sa ia ta’ua foi ua fetaui lelei le maua o lenei fesoasoani ma le agai o le TVOne aua le pu’eina ma le faamaumauina o isi fono tetele ia o loo loma nei, e pei o le fono a taitai o le itulagi mo faigafaiva ma taaloga a tupulaga talavou o le Taupulega lea foi e alo atu iai Samoa ini nai tausaga o lumanai.
O le faamatalaga a le sui o le KBS o le a avea lenei fesootaiga ma auala o le a faamalosia ai foi le va galulue faatasi a lea televise ma le TVOne ma o a lava nisi fesoasoani e moomia i le itu tau i aoaoga ma nisi mea faigaluega o le a fesootai pea i aso o i luma.
O le TVOne o se televise lea na mua’i faavae e le Malo i lalo o le igoa o le Televise Samoa a’o tuufaatasi ai ma le leitio a le malo le 2AP, mae’a lea tuu eseese auaunaga e ua ma faaigoa ai o le Samoa Broadcasting Corporation ina ua avea ma Faalapotopotoga tumaoti a le Malo, peitai na faatau e le Malo ma o tagata ma faalapotopotoga na mana’o e faatau sea o lenei auaunaga lea ua o latou faaauau ona faatino lenei auaunaga lea ua faaigoaina ai o le Samoa Quality Broadcasting Company Ltd ma o loo faaauau lava ona faia le auaunaga e le gata i polokalame ua tuufaatasia ma faalauiloa i Samoa lava ia ae ua faapea foi ona aumaia faasalalauga mai i fafo aemaise i taaloga eseese faapea ai ma tifaga ma faafiafiaga ua faatau mai mo faasalalauga i aso uma.
