Na auai atu le mamalu o le auvalaaulia aemaise o mātua ma uo i totonu o le Maota o le Palemene i Ueligitone, i le afiafi lagilelei ma le toafilemu o le Aso Lua 9 o Tesema, ina ia talia fiafia faailoga aloaia a le Palemia na lagolagoina e kamupani ma ofisa eseese, ua mafai ona ofoina atu mo tamaiti Pasefika ua iloga le tomai ia latou matati‘a ma taleni ua molimauina.
Na amata lenei sauniga mamalu i le sauniga lotu na taitaia e le susuga i le faifeau ia Andrew Afamasaga ona faasolo ai lea polokalame e le MC pito sili ona laitiiti o Iavana Seuala (13 tausaga) mai le nuu o Faleasiu, Leulumoega ma Lotoanuu. E ese foi lagona ofo o le mamalu o le auvalaaulia i le to‘a ma le manino o le tautala a lenei alualutoto.
O lea foi na ta‘ua i le saunoaga a le afioga i le Palemia o John Key, e lē iloa poo Iavana Seuala le Palemia muamua lea o le Pasefika i le malo o Niu Sila i le lumanai.
E masani ona faia i tausaga taitasi le ofoina atu o nei sikolasipi e le Palemia mai le Ofisa o Tagata o Atumotu. O le aufaigaluega foi o le Ofisa o le MPIA lea na feagai ma le faatinoga o tapenaga uma o lenei faamoemoe matagofie i totonu o le Palemene o le malo o Niu Sila. O i latou la nei na manumalo ai, sa tolaulauina e le susuga ia Ana Tuisila mai le Ofisa o Tagata Atumotu:
Sione Manuolevao (24 tausaga – Tonga) na lagolagoina e le Ofisa o Tagata o Atumotu. O le a ulufale i le iunivesete o Vitoria e aotau mo le faailoga i itu tau polokiki faavaomalo.
Paxton Maligi (18 tausaga – Samoa/Niu Sila) na lagolagoina e NZ Institute of Sports. O le a aotauina i le iunivesete a Aukilani (AUT) mo le faailoga o le Bachelor of Sport and Recreation.
O le kamupani a Black Bulb e toafā tamaiti na faatuina lenei pisinisi. O Wilson Lesa le CEO (18 tausaga – Samoa/Kiripati); Raniela San Sebastian; Naotia Atiana Norsa ma Mile Fonoia mai le Kolisi a Manurewa. O loo lagolagoina e le Pacific Business Trust & Wespac. E faamoemoe lenei vaega e faatuina ni pisinisi se tele mo le suiga o galuega lelei mo tagata Niu Sila.
O Thomas Fonua (22 tausaga – Samoa/Tonga) o loo lagolagoina e Creative NZ. O lenei alii na malaga atu i Kanata mo le faafiafia i siva i le 2010, toe foi mai ma o loo faamoemoe e faia se kamupani faafiafia i totonu o Niu Sila.
Lauraina Funaki (17 tausaga – Niue) o loo lagolagoina e le Youthline & Ako Aotearoa i le sikolasipi o le Learning and Teaching, ma o loo faamoemoe e ulufale i se iunivesete mo le faailoga o le faaloia ina ia avea ma loia e galue mo tagata Pasefika i le lumanai.
Na saunoa le susuga i le Palemia o John Key e faafetaia taleni ua mautinoaina a nei alo o le Pasefika ina ia avea ma taitai lelei o le lumanai o tagata Pasefika ma Niu Sila.
Sa faapea foi ona saunoa faalaeiau le Minisita o Tagata Atumotu le afioga ia Peseta Sam Lotu-Iiga ma tulimataia le galue faamaoni o i latou ua faamanuiaina ina ia tini a latou miti mo se lumanai lelei o i latou, mātua ma aiga aemaise lava o le Pasefika ma Niu Sila aoao.
