O le vaiaso nei o le a faalauiloa aloaia ai i Niu Sila le taamilosaga o fusuaga faapolofesa a le Pasefika, le Pacific Rim Boxing Championship, lea o le a talimalo ai Niu Sila i le vae muamua o le taamilosaga e faia i Aukilani i le aso 21 o Aperila.
O le vae lona lua o le taamilosa o le a talimalo ai Fiti ia Iulai, ona sosoo ai lea ma Tahiti ia Oketopa ae taualuga i le vae mulimuli ia Tesema lea o le a talimalo ai Samoa.
Ua faalauiloa mai ai foi ma sui o le Komiti Faafoe o le taamilosaga lea ua filifilia ai le fetalaiga Pa‘u Fereti Puni ma taitaifono o fusuaga faapolofesa a le Pasefika.
O le fetalaiga ia Pa‘u o le faatonu sili o le kamupani tuma‘oti Samoa, Event Polynesia, lea o loo taulamua i le lalagaina o fusuaga faapolofesa a Samoa ma le Pasefika.
O le Komiti o le Taamilosaga (Championship Committee) ua filifilia i ai Abdul Khan o Fiti (Wild West Promotions), Tuilagi Saipele Esera o Samoa (Samoa Pro-Am Fights), Patrice Gobrait o Tahiti (Polynesia Professional Boxing League) ma Jenkins Tesese o Niu Sila (Manukau Pro-Am fights).
O le Komiti o Sailiga Siamupini (Title & Ranking Committee) ua filifilia i ai John Glozier o Niu Sila (WBO Asia Pacific Supervisor), Rakesh Martin o Fiti (President PBWA of Fiji), Ale Vena Ale o Samoa (Secretary General, South Pacific Boxing Incorporated) ma Reginald Leca o New Caledonia (UBO Oceania Commissioner).
O le fonotaga a le au faifusuaga (promoters) a le Pasefika sa faia i Apia i le aso 29 o Novema na filifilia ai tofiga o le Pacific Rim Boxing Championship ma faamautu ai le avea o Samoa, Niu Sila, Fiti ma Tahiti ma atunuu faavae o le taamilosaga.
Faaalia e Pa‘u, “O le mea mautinoa, na o le lua lava taaloga e mafai ona siamupini ai Samoa ma atumotu o le Pasefika i taaloga a le Lalolagi. Na o le lakapi taitoafitu ma fusuaga faapolofesa.
O le faamaoniga o lenei mau, ua oo Samoa ma Fiti i le siamupini o le lakapi taitoafitu a le IRB; o Maselino Masoe o Samoa na avea ma siamupini o le World Boxing Association (WBA). Ua tatau nei i atumotu o le Pasefika ona ave le lagolago i fusuaga.”
O le faatuina o le taamilosaga o fusuaga faapolofesa a le Pasefika, e lē gata o le a maua ai se taamilosaga maualuga e tausinio ai tama fusu a le Pasefika e tapena ai mo taamilosaga a le Lalolagi, ae o le a siitia ai foi le tulaga o laufali ma faamasino o fusuaga.
Fetalai Pa‘u, “E ui ina ua leva fusuaga i le Pasefika, peitai e lē o iai se faatulagaga e sosoo ai le olaga fusu ‘amateur’ o tama taaalo sa tauave ai le igoa o lona atunuu ma le see atu i fusuaga faapolofesa e avea o sana galuega tumau e saili ai sona manuia ma lona aiga.”
Peitai o se tulaga o loo faafetai ai e le toatele e malamalama i taaviliga o taaloga faapolofesa le galuega a le kamupani Samoa o le Event Polynesia o loo faafaileleina tama fusu Samoa e pei ona maitauina ai le tulaga lelei ua iai nisi o alii fusu e pei o Satiamalii Vaitele Soi o Vailele, Taga ma Vaovai Falealii faapea Warren Fuiava o Fa‘ala Palauli ma Lalomalava.
O le vaiaso atu i tua na faapea ona faalauiloa aloaia ai le Pacific Rim Boxing Championship i Fiti lea na saunoa ai le alii faifusuaga numera tasi a Fiti ia Abdul Khan, “O le taamilosaga lenei o le a siitia maualuga ai fusuaga i totonu o Fiti.”
Faaalia e Tuilagi, “O le vaiaso fou o loo fuafua e faalauiloa ai le aufusu a Samoa ua amata ona tapena nei mo le taamilosaga i Aukilani ia Aperila.”
I isi tala o fusuaga, e lei manuia le fusuaga i le Aso Toonai na tea nei a Oli Filimaua o Samoa ina ua taofia e le laufali le la fusuaga ma Santos Pakau o Amerika i le taamilosaga lima i le paga faapitoa o le Shamrock Promotion na faia i Aukilani.
