Filifilia le alii loia e pulea taaloga uma i Samoa

Ua filifilia nei le Pelesetene fou o le faalapotopotoga e pulea taaloga uma i Samoa faapea ma le komiti o taaloga Olimipeka le SASNOC (Samoa Association of Sports and National Olympic Committee).
O se tasi o alii loia e iloga foi i le taaloga tapolo mo le tele o tausaga, o le susuga lea ia Patrick Fepulea‘i, lea ua tulai mai nei o le Pelesetene fou mo lenei faalapotopotoga tāua i le atunuu.
O le po o le Aso Faraile, ina ua faataunuuina le fonotaga faaletausaga a le faalapotopotoga i lona nofoaga masani i Tuanaimato, na faia ai lenei filifiliga mo le Pelesetene fou o le faalapotopotoga, faapea foi nisi tofiga tāua.
Na filifilia ai foi ma Sui Pelesetene e toalua; o le Afioga Togatalima Faafouina Milford mai le taaloga o le faipele, ma le Tofa Lefau Harry Schuster mai le taaloga o le lakapi.
O le Tofa Nuu Vaeolenofoafia Vui Tapasu Leung Wai, lea sa tauaveina muamua le tofiga o le pelesetene, ua see ane nei i le filifiliga e avea ma Failautusi aoao, ua suitulaga ai i le susuga Aveau Niko Palamo lea sa ia umia lea tofiga, ae o le susuga Pauga Tala Pauga ua tofia e avea ma Teutupe a le faalapotopotoga.