Fesoasoani le Westfono Health Trust i mafatiaga o Samoa i le sunami

O le Westfono Health Trust o le vaega autu a le soifua maloloina o loo avea ma toomaga o le mamalu o tagata Pasefika e aumau i le itu i Sisifo o Aukilani, e autovaa atu i ai mo togafitiga o le soifua maloloina.
Ma e iu i le faasologa pisi a o latou alii ma tamaitai fomai aemaise foi le vaega a tausi soifua maloloina, ae na lei taofia ai le agaga alofa ma le fia tuu atu o le tauau e fesoasoani i tagata o si o tatou atunuu faapea foi lona uso tuaoi i Tonga, na mafatia i aafiaga ona o le mala faalenatura na taia ai nei motu i le masina o Setema.
O nisi la o le aufaigaluega mai lenei falemai le Westfono Health Trust, na iai i le uluai vaega o ē na tauofo o latou taimi e malaga ai i Samoa ma Tonga, e faaoo atu lea fesoasoani, e le gata i sapalai o mea e faaaoga e pei o vailaau, fualaau ma isi mea faapena, aemaise foi o latou taimi mo le togafitia o manuaga o le tino, aemaise le fesoasoani i le itu o le mafaufau, aua o nisi tagata e feoloolo manuaga o le tino e vave ona toe fofō nai lo manuaga o faalogona o loo matua tigaina ai talu mai lenei mala.
O le aave mai o tala o lenei faalavelave ma le vaavaai atu foi i ata mai le televise i le anoanoai o tagata manunua ma le galulue faasoloatoa i le ao ma le po o nai alii ma tamaitai fomai i Samoa e tuu atu le fesoasoani, na lagona ai e nai uso ma tuafafine o loo galulue i lea falemai a le Westfono, ua moomia ona faaoo atu sa latou faamāmā avega i o latou uso fomai i Samoa.
Lea la na malaga atu ai loa le tamaitai fomai, Dr Kuinileti Chang Wai ma le Tausi Soifua Maloloina, le tamaitai o Eseta Naidu e faatino le la auaunaga fesoasoani, lea sa faamautu i le Maota Gasegase o Tupua Tamasese i Motootua, ma tausavali ai i tua i le Falemai i Lalomanu, o ina sa toatele foi tagata manunua na taooto ai ona o le afioaga pito sili lea ona aafia i le galulolo.
O se tasi o itu na sili ona aoga ai le auaunaga a nai tamaitai fomai mai Niu Sila, ona o le malamalama lelei i le gagana Samoa aemaise foi lo la silafia i tu ma aga i fanua a a le atunuu, lea sa telē se fesoasoani i le fesootai sao atu ia i latou o aafia, a o taumafai e togafiti le tele o o latou manuaga eseese.
Sa malaga atu foi la i Samoa ma le alii o loo avea ma pule o galuega faatino a le Westfono Health Trust (Operations Manager), le Susuga David Lui, ma na malaga atu Lui i Samoa e auai i toe sauniga o nisi o ona tauaiga sa aafia i lenei faalavelave, ma molimoli atu ai foi nisi pusa o mea o loo sili ona manaomia i nei lava galuega faafomai mo i latou o loo afaina i manuaga.
E moni le upu, ‘e itiiti mea na faalogo i ai i lo mea na vaaitino i ai.’ O le mea moni lea na molimauina e le vaega a le Westfono Health Trust ina ua latou taunuu i Samoa ma silasila totino i mea na faaleagaina aemaise aafiaga ua oo i nei tagata.
I lenei lipoti tuuina mai o loo taua ai, e le na o mafatiaga i meatotino ma afioaga ua faaleagaina ma i latou ua maliliu, ae o le isi ogaoga o mafatiga ua iai, o loto ua matua nutipalaina i faanoanoaga o nai nei tagata, ma o se vaaiga e lei faigofie foi ona faatoafilemuina ai o latou lagona a o vaavaai atu i ai.
O le tulai mai o lenei faafitauli a o ai le Susuga David Lui i Samoa, na iu ai ina faaaoga lona tomai tau fesoasoani i mataupu o le mafaufau, ma latou galulue ai faatasi ma se vaega o fomai o le mafaufau e fesoasoani i le mamalu o le atunuu na iloga ona mafatia o latou faalogona i lenei faalavelave.
Taua i lenei lipoti o nisi tagata e maua atu ua na o le saofafai ma sioa i le sami, ua le mafai ona tautatala, e peiseai ua leai ni upu e mafai ona latou faamatala ai lenei mea uigaese na latou vaaia.
Sa taumafai lenei vaega e saili i nai tagata ua nonofo i nofoaga maualuluga i uta i le vao, ma faaoo i ai le fesoasoani i itu o loo sili ona latou moomia ai, ma ua faia foi fuafuaga ina ia faaauau i le lumanai ni polokalame e faatalatalanoa ma faufautua ia i latou o iai mafatiaga tau faalogona.
Na molimauina foi lagona fenuminumiai o nai isi tagata. O nisi e feita, e faavauvau, a o nisi foi ua fefefe ma tautino lo latou le toe fia foi e nonofo i nofoaga i le talafatai sa iai muamua.
O loo faagasolo foi galuega fesoasoani a faafeagaiga o afioaga, peitai e oo foi i nisi o i latou, o loo sili foi ona mafatia pe afai sa aafia tonu ai o latou aiga i lenei mala. O loo faagasolo pea la galuega fesoasoani mo nai tagata o si o tatou atunuu ua aafia, i le itu i manuaga o le tino, aemaise manuaga o le mafaufau ma faalogona.