E lē o nofo lelei lagona ma finagalo o matai o Luatuanuu i se faasalalauga a leoleo na faailoa ai le toe agai o Malu o le Malo i se valaau ona sa toe poloka le aualatele e nisi tupulaga o le nuu o loo sailia e leoleo poo ai.
O le vaveao o le Aso Tofi na tea nei na toe logoina ai leoleo i lea gaioiga, ma e faapea mai le faasalalauga mai leoleo na faaaogā taga oneone e laina i le auala ae ogatotonu ai se ipu ose faleui (tulou).
Fai mai foi leoleo na taunuu nisi o Malu o le Malo e aveese le poloka ae na faafeiloai e nisi o matai o Luatuanuu ma ave ai le tuualalo i leoleo e taatia atu o le a saili poo ai na faia le poloka o le alatele. Na ta’ua foi e leoleo e iai se taavale na afaina ina ua tau’ai i ni maa faapea nisi na aafia ini maa.
E lē o talia e Luatuanuu lea faamatalaga a leoleo ona ua faaalia e se matai o le afioaga le susuga Tofete Lafaua Tofete i se lipoti a le nusipepa o le Samoa Observer, e leai ma se ipu faleui i le vaega o le alatele na ta’ua e leoleo sa faia ai le poloka.
“Sa na’o faaputuga oneone na iai, ma sa matou savavali iai i le vaega na fai mai leoleo na poloka, ou te lē iloa poo le ā le taumafaiga a leoleo o loo fai, fua ina latou faia na faamatalaga sese ma le lē sa’o”.
O le feiloaiga a tusitala ma le Palemia i le vaiaso i tua atu na ia faailoa ai se matai o Luatuanuu e alala i fafo ae ua malaga i Samoa ma faamaopoopo se taumafaiga tau faamasinoga faasaga i leoleo ma le poloka o le auala na tulai mai i le masina o Mati.
Fai mai Tofete i lona finagalo i le nusipepa o le 2 i le vaveao na tu’itu’i atu ai le faitoto’a o lona fale ma na alu ane iai ae ia vaaia se vaega toatele o leoleo i fafo o le fale.
“Ou te leiloa pe aisea na o mai ai fua ia te au ae lē agai sa’o i le vaega na fai mai o loo poloka ai le alatele”.
O loo suesueina e leoleo poo ai na faia le polokoa o le alatele i le vaveao o le Aso Tofi na tea nei. Na fono matai o le nuu ina ua toe aliali mai lea gaioiga ma e lē o iloa poo ua maua nisi na faia le poloka.
E to’a 15 tagata Luatuanuu e aofia ai ma le Pulenuu ua molia e leoleo. O le matai lea sa avea ma Pulenuu ua faamuta e le Matagaluega o Tina ma Tamaitai lona tofi.
O le matagaluega lea e iai ma le vaaia o le vaega o le lotoifale e gafa ma le filifilia o Pulenuu. O le Kapeneta foi e iai le faaiuga mulimuli o le filifiliga ose Pulenuu o se afioaga.
