O le faaiuga o le vaiaso na faalauiloa ai e se nusipepa ua tele ina lauiloa ai i Ausetalia nei e faapea, o le a faaipoipo le tamaitai Palemia o Julia Gillard i lana manamea ua leva ona la mafuta le alii o Tim Mattieson.
Peitai i se faatalatalanoaga i luga o le televise a le ABC ma le tamaitai Palemia lea na ia ta‘ua ai e lē o iai sona faamoemoega i sana faaipoipoga i le taimi nei ona o loo tele galuega tāua e ao ina faamuamua i lona taimi a o avea ai o ia o se Palemia o Ausetalia.
Na ia saunoa foi e na te lē malamalama foi poo fea e agai mai ai tala ua salalau solo nei ma tala feaveai e pei ona silafia foi e le aufaitau, e tasi lea mataupu na lugā lalō ai Ausetalia i le taimi na tulai mai ai Gillard o ia Palemia tamaitai o Ausetalia, ona o loo nonofo faapouliuli ma lana manamea ma o ia foi o se tagata e lē talitonu o loo soifua le Atua.
Ae peitai na faaalia manino e Gillard, a fua i ana galuega o loo fai i le taulamua lea e fesoasoani atu i ē ua matitiva, atoa ai ma i latou o loo maua i le gasegase o le mafaufau ma le lē atoa o le malosi, e sili atu nai lo latou o fai mai o Kerisiano moni ae lē o galulue.
I le taimi nei o loo fiafia pea la‘ua ma Tim, a o loo iai pea nisi o loo taumafai malosi e unaia le tulafono ia faaipoipo atu le aliii i le alii poo le tamaitai i le tamaitai, a o ia o le tamaitai Palemia a Ausetali na te lē lagolagoina lea mataupu ona e lē talafeagai i lana faigamalo ma e na te matuā teena lava lea mataupu, o se vaega lava lea o lana saunoaga.
